لاہور، اُرا سیٹی جوڑ ٹیوشن سنٹر نا چھت تما، 14 چنا زوال

لاہور نا علاقہ کاہنہ نو ٹی ٹیوشن نا وخت آ اسہ ہنکینی اُراسے نا چھت انا تمنگ آن 14 چنا زوال مسر، 6 چنا نا حالیت جوان و 10 چنا نا حالیت بھاز خراب ءِ‘ ہرافتے ہسپتال اٹ داخل کننگانے۔ ایلو چناتے کشنگ کن کمکی کارروائی کننگا۔ حوال نا رِد اٹ کاہنہ نو نا خلق عید گاہ ٹی اسہ اُرا اسے ٹی ٹیوشن سنٹر جوڑ کروک ئس۔ ہراڑے ہڑدے ئی بنداو آ کم و ود 35 چنا خواننگ کن بسرہ۔ دا واقعہ ہمو وخت آ پیش بس ہراتم ٹی آر گارڈر اٹ جوڑ مروک اُرانا چھت اناگت تما و تہٹی ساڑی چناک اونا کیرغ آن گٹ مسرو۔ واقعہ غان دمدستی پد ہندی الس کمکی ادارہ غاتے حوال تس، ہراڑان پد پولیس و کمکی ٹیمک ہند آ سر مسر۔ بنائی کارروائی ٹی نیاڑی استاد تون اوار کیہی چناتے دمب آن کشنگانے وخت اس کہ ایلو چناتے ہم اوکان پد کشنگا۔ کمکی کارندہ غاک پاریر کہ دمب آن کشوک کیہی چناتا ساہ بند مننگ اٹی ئس، ہرافتے دمدستی ہسپتال آ گدریفنگا۔ کیہی ٹھپی چناتا حالیت بھاز خراب ئس‘ اُرا نا چھت آ مِش انا بھلو ڈیمبری اس ساڑی ئس ہرانا سوب آن چھت انا تمنگ آن پد چناک مِش انا کیرغ آن گٹ مسنو۔ کمکی ادارہ غاک پارینو کہ ریسکیو آپریشن داسکان برجا ءِ و چناتا پورو کچ انا معلوم مننگ کتنے۔ داسکان 20 چناءِ کیرغ آن کشنگانے و ہندی الس نا رِد اٹ ٹیوشن سنٹر اٹی ہڑدے 35 چنا خواننگ کن بسرہ۔ کمکی کارندہ غاک رکھ انا رد اٹ بھلا ازباب آتا کاریم اٹ اتنگ نا جاگہ غا دو اٹ مش تے اینک کریر۔ تانکہ گٹ مروک چناتے پین نسخان مف۔ وزیراعلیٰ پنجاب مریم نواز و وزیراعظم شہباز شریف دا ارمانی آ واقعہ نا نوٹس ءِ ہلسا دمدستی جاست پاست نا پارت کرینو۔