سندھ طاس معاہدہ پاکستان نا 24 کروڑ الس نا لائف لائن ءِ،بنجائی حوالکاری وزیر

بنجائی وزیر حوالکاری و شینکاری عطاء اللہ تارڑ پارینے کہ سندھ طاس معاہدہ پاکستان نا 24 کروڑ الس نا لائف لائن ءِ ہراٹی ہچ وڑانا تینا خود آن ترمیم، منسوخی یا معطلی مننگ کپک‘ بھارت نا کنڈآن معاہدہ ءِ تینا خود آن معطل کننگ نا بے سہب کوشست کننگا ہرانا سوب آن اودے چندی جہانی فورم تیا شکی گری تون مون تروئی تما، پاکستان دِیر انا حق انا رکھ اکن ہر کہول آ گام گیج کیک۔ داخیال آتا درشانی ءِ او سے شنبے نادے آ جناح کنونشن سینٹر اٹی ”سندھ طاس معاہدہ، امن و علاقائی سوگوی نا اہم وڑ“ نا سرحال آ اڈ ہلوک جہانی سیمینار نا بنائی سیشن آن تران کرسا کرے۔ داوخت آ وزیر دفاع خواجہ محمد آصف، مسکوہی بنجائی وزیر خرم دستگیر، مسکوہی صدر نیشنل ڈیفنس یونیورسٹی لیفٹیننٹ جنرل (ر) عامر ریاض، انسٹیٹیوٹ آف ریجنل اسٹڈیز نا صدر ایمبیسیڈر جوہر سلیم، مسکوہی بنجائی وزیر کانود احمد بلال صوفی، انڈس واٹر ٹریٹی کمشنر سید مہر علی شاہ تون اوار جہانی آبی چاہندار آک ہم ساڑی ئسر۔ بنجائی وزیر حوالکاری پارے کہ اینو نن بیرہ سندھ طاس معاہدہ غا گپ وتران کپننگ اُن بلکن پاکستان نا 24 کروڑ آن زیات الس نا لائف لائن آ ہیت کننگ اُن۔ سندھ دامان نا تہذیب ننا قومی شناخت نا بنداو و قوم انا وڑ اٹ ننا پجارءِ۔ نن دا عظیم تہذیب نا وارث اُن۔ نن سندھ دریاب و اونا کمکار دریاب آتا رہی آ ہندی رہینگوک اسہ قوم اسے اُن۔ اوپارے کہ دِیر زند ءِ و سندھ دریاب پاکستان ءِ زند عطاکرینے۔ اوپارے کہ سندھ دریاب ننا لائف لائن ءِ و پاکستان نا 24 کروڑ الس ءِ اونا دِیر آ امنائی کروک حق دوئی ءِ۔ اوپارے کہ پاکستان کن دِیر بیرہ اسہ وسیلہ اس اف بلکن زند انا ویل ءِ، دریائے سندھ انا آبی نظام پیڑی تیان دنیا نا متکن انگا تہذیب آتیان اسٹ نا آبیاری کرسا بسنے۔ اوپارے کہ گلگت بلتستان نا بڑزکو مَش تیان ہلیس پنجاب و سندھ انا آباد میدان تسکان دا دِیر ننے جغرافیہ و تاریخ تون گنڈسا بسنے۔ پاکستان نا کِسہ کیہی حوالہ غاتیان سندھ دریاب نا کِسہ ءِ۔ بنجائی وزیر حوالکاری پارے کہ 1960ء نا سندھ طاس معاہدہ جہانی تعلقداری ٹی اسہ یکتا ہند اس تخک۔ ورلڈ بینک انا کماشی ٹی پک کروک دا معاہدہ جنگ، سیاسی شیف و بڑزی و بھلو وخت اسے نا بے چیٹی آن پد ہم برجا سلیسنے۔ اوپارے کہ شش دہائی آن زیات وخت اسکان دامعاہدہ نا سوگوی دا راستکی نا درشانی ءِ کہ کمکاری، گپ و تران و جہانی قول آتا پاسداری امن نا اسٹ انگا مدامگی کسر ءِ۔ دامعاہدہ قاعدہ غاتالان جہانی نظام نا اسہ نمان درور ءِ ہرا نیک نیتی نا اصول، معاہدہ غاتا شرف وپرامن وڑوڈول اٹ جھیڑہ غاتا ایسری نا درشانی ءِ کیک۔ اوپارے کہ دا بیرہ کانودی خیال اف بلکن ہمو بنداو آک ءُ ہرافتیا پت سلوک مریک۔ بنجائی وزیر پارے کہ وزیراعظم شہباز شریف، فیلڈ مارشل سید عاصم منیر و وزیر دفاع خواجہ محمد آصف کیہی ہند آتیا پیدوار کرینو کہ پاکستان نا الس ءِ دریائے سندھ انا دِیر آ حق دوئی ءِ و سندھ طاس معاہدہ ٹی نئے تو تینا خودآن ترمیم کننگ مریک نئے اودے منسوخ، معطل یا بے اثر کننگ مریک۔