چیف سیکرٹری نا کماشی ٹی دیوان بلوچستان نا سرکاری محکمہ غاتیٹی بے کار تموک گاڈی تا لڑ اس ٹہیفنگ نا پارت

چیف سیکرٹری بلوچستان شکیل قادر خان نا کماشی ٹی سیکرٹریز کمیٹی نا تُوئی دیوان اڈ ہلک۔ دیوان اٹی چیئرمین سی ایم آئی ٹی محمد علی کاکڑ، ایس ایم بی آر کمبر دشتی، ایڈیشنل چیف سیکرٹری شونداری زاہد سلیم، ایڈیشنل چیف سیکرٹری داخلہ محمد حمزہ شفقات، کل محکمہ غاتا سیکرٹری، کمشنر و تعلقدار افسر آک بشخ ہلکر۔ دیوان اٹی شونداری ڈٹ آتا پورو مننگ، ٹینڈر نا شفافیت و ورنا تے روزگار نا جوان وارخواہی تا فراوانی کن خالی اسامی تیا تقرری تون اوار اہم باندات آتا جم جاچ ءِ ہلنگا۔ دیوان آن تران کرسا چیف سیکرٹری صوبائی انتظامیہ نا کارکڑد ءِ پین جوان کننگ، سرکاری وسیلہ غاتے بھرمی کاریم اٹ اتنگ و شفافیت ءِ شون تننگ آ زور شاغا۔ او پارے کہ السی وسیلہ غاتا سہی کاریم اٹ اتنگ حکومتی زمواری ءِ و اودے پرسجوئی نا وڑ اٹ سر تننگ مرے۔ او پارت کرے کہ سرکاری محکمہ غاتیٹی بے کار گاڈی تا لڑ اس ٹہیفنگے و قومی کانود و ضابطہ غاتا رِد اٹ شفاف نیلامی نا کمک اٹ بہا کننگے۔ دا وخت آ دیوان ءِ پاننگا کہ داسکان 300 گاڈی تا نیلامی نا ریسہ برجا ءِ۔ چیف سیکرٹری تعلقدار محکمہ غاتے پارت کرے کہ ٹینڈر نا شفافیت ءِ پک کننگ کن گام گیج کننگے و سنگل بڈرز نا وڑ اٹ ٹینڈر آتے مسترد کننگے تانکہ شفافیت برجا سلے۔ او صوبہ ٹی ورنا تے روزگار نا وارخواہی تے ودفنگ آ زور شاغار و پارے کہ خورک آ اسامی تیا دمدستی تعیناتی کننگے۔ او پارے کہ میرٹ نا رِد اٹ تقرریک شفاف وڑاٹ کننگر و جانجوڑی، تعلیم و ڈٹ بندی نا بشخ آتیٹی خالی اسامیک اولیت نا بنداو آ پُر کننگر تانکہ بنداوی خذمت آتیٹی جوانی برے و ہندی ورنا تے روزگار رسینگ کے۔ دیوان اٹی مچ آ صوبہ ٹی برجا شونداری ڈٹ آتا پیش رفت نا جم جاچ ءِ ہلسا پاننگا کہ مالی سال 2026-27 اٹی 5618 شونداری ڈٹ آک اوار ءُ ہراٹی 3761 برجا و 1857 پوسکن ءُ ڈٹ ءُ۔ چیف سیکرٹری تعلقدار محکمہ غاتے پارت کرے کہ ڈٹ آتا پک وخت آ عملدرآمد ءِ پک کننگے، اڑاند آتے دمدستی ایسر کننگے تانکہ السی فائدہ غاک وخت آ دوئی مننگ کیر۔ او پارے کہ ہرا ڈٹ آک ہرے آ پورو مریرہ او السی پت ءِ زہمی کیرہ، ہندا سوب آن ڈٹ آتا چاروکی و وخت آ رپورٹ المی ءِ‘ او پارے کہ بجٹ نا گچین مینجمنٹ آن ڈٹ آک وخت آ پورو مریرہ ونہادی وسیلہ غاتا نسخان ءِ توننگ مریک۔