سوگو و فعال پارلیمان پرامن و شوندار راج انا بنداو مریک/وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی جہانی پارلیمان دے انا وخت آ تینا کلہو اٹی پارینے کہ دا دے مچ آ دنیا ٹی جمہوری قدر، پارلیمانی ربیدگی، کانود نا حکمرانی و السی نمائندگی نا اہمیت ءِ پاش کننگ نا اسہ گچین ءُ وارخواہی اس فراوان کیک۔ او پارے کہ سوگو و فعال پارلیمان اسہ سوگو، پر امن و شوندار ءُ راج اسے نا بنداو مریک، ہراڑے الس نا توار ءِ آئینی و جمہوری وڑ اٹ بننگ و کانود سازی نا کمک اٹ قومی ویل آتا ایسری ءِ پٹنگک۔ وزیراعلیٰ پارے کہ پاکستان نا آئین پارلیمانی جمہوریت ءِ سوگو ءُ بنداو اس فراوان کیک و کل ریاستی ادارہ غاک آئین نا دنگ اٹی مرسا تینا زمواری تے سر ایترہ۔ او پارے کہ جمہوری ادارہ غاتا سوگوی، آئین نا بالادستی و کانود نا حکمرانی قومی یکجہتی، سیاسی سوگوی و مدامگی شونداری نا ضمانت ءُ۔ میر سرفراز بگٹی پارے کہ بلوچستان اسمبلی صوبہ نا الس نا است انا ارمان تا ترجمان ءِ و حکومت السی ویل آتا ایسری، بھرمی کانود سازی، شفاف طرزِ حکمرانی و السی خذمت ءِ تینا اولیت تکک۔ او پارے کہ الس نا پت آ پورو بننگ کن پارلیمانی ربیدگی، پرسجوئی، شفافیت و سلابت نا اصول آتے پین سوگو کننگ وخت انا اہم ءُ گرج اسےِ۔ وزیراعلیٰ بلوچستان پارے کہ ساڑی دور اٹی پارلیمان نا کڑد بیرہ کانود سازی اسکان کچ اف بلکہ قومی امنائی، راجی ہمگرنچی، السی آسودہی و مدامگی شونداری نا مسخت آتا دوئی کننگ ہم بنجائی حیثیت تخک۔ او پارے کہ نیاڑی، ورنا و راج انا کل تپہ غاتا بھرمی نمائندگی جمہوری نظام ءِ پین سوگو کیک۔ او دا ارادہ نا دوارگی ءِ کرے کہ بلوچستان حکومت آئینی بالادستی، جمہوری ربیدگی، شفاف حکمرانی و السی خذمت نا اصول آتیا کاریم کرسا صوبہ ٹی گڈ گورننس، گچین کانود سازی و السی آسودہی کن تینا کوشست آتے برجا تخک۔ وزیراعلیٰ پارے کہ سوگو پارلیمانی نظام اسہ سوگو، آسودہ و شوندار ءُ پاکستان اسے نا ضمانت ءِ۔