سوئٹزر لینڈ اٹی اہم انگا بریک تھرو آن مچ آ جہان اٹی امن مریک،وزیراعظم شہباز شریف

وزیراعظم محمد شہباز شریف ایران و امریکہ نا نیام اٹ جنگ بندی نا معاہدہ ٹی پاکستان نا خیرخواہی کڑد ءِ تاریخی سرسہبی گوندسا پارینے کہ سوئٹزر لینڈ اٹی مروک آ دا اہم بریک تھرو آن جہانی امن مریک، او سے شنبے نادے آ قومی اسمبلی ٹی گپ وتران کریکہ۔ وزیراعظم شہباز شریف پارے کہ ای اپوزیشن لیڈر نا مون آ گڑاس پیش کننگ خواہسٹہ ولے او داوخت آ ایوان اٹی افس۔ اوپارے کہ اینو ولدا اسہ تاریخ ساز ءُ دے اسے، ہراتم ملخدو برگن سٹاک (سوئٹزرلینڈ) اٹی ایران و امریکہ نا نیام اٹ منہ دے مست پک مروک آ ایم اویو نا رد اٹ ہڑتوم آ ملک آتا سرکڑدہ غاک دانگ بسر ہراڑا پاکستان ہم خیرخواہ نا وڑ اٹ دستخط کریسس۔ الحمدللہ پاکستان ہموڑے بھاز سِخت و عرق ریزی اٹ ہڑتوم آملک آتا نیام اٹ فاصلہ غاتے کم کننگ کن تینا پبی کوشست آتے کرے ہراٹی دے و نن گپ وتران نا ردوریسہ چلینگسا کرے۔ اخیر سہب انا کم و ود دونیم سہ بجہ غا اسہ اسیجائی اعلامیہ اس تیار کننگا ہرادے کل فریق آک پک کریر۔ اوپارے کہ اینو الحمدللہ اللہ تعالیٰ نا فضل و کرم اٹ امریکہ و ایران نا نیام اٹ نئے بیرہ جنگ بندی مسنے بلکن بروک آ 60 دے تیٹی ٹیکنیکل مذاکرات مریک ہرافتے ٹی اہم باندات آتیا گپ وتران مریک، ننے پورو اومیت ءِ کہ ان شاء اللہ داایم اویو60 دے انا تہہ ٹی اسہ مدامگی معاہدہ سے ٹی بدل مریک ہراڑان دنیا ٹی امن مریک۔ وزیراعظم شہباز شریف اسپیکر قومی اسمبلی سردار ایاز صادق ءِ پارے کہ ای اینو نے، اپوزیشن لیڈر ءِ، داایوان اٹی ساڑی کل شرفمند آ باسک آتے و پاکستان نا 24 کروڑ الس ءِ است انا ہب اٹ مبارکبادی ایتوہ، انتئے کہ دا جنگ بندی نا عمل اٹی پاکستان ہرا اہم کڑد ءِ ادا کرینے، او نئے بیرہ تاریخ ساز ءِ بلکن دنیا نا پنی آ اخبارک، چائے او واشنگٹن پوسٹ مرے، فنانشل ٹائمز مرے یا نیو یارک ٹائمز، کل تینا فرنٹ پیج آ پاکستان نا دا کڑد ءِ پیدوار کرینو۔ داڑے ساڑی شرفمند باسک آک داہیت ءِ پک کیرہ کہ پاکستان نا بابت دا ہرامثبت بیانیہ و عزت مون آ بسنے، اگہ نن ارب آ روپئی تے ہم خڑچ کرینہ ولداہم دا دے دوئی کننگ کتونہ۔ ای خواہسٹہ کہ اپوزیشن لیڈر نا مو ن آ داہیت آتے کریٹہ ولے ای مونی کاوہ۔ کنے بھاز خوشی اٹ داپاروئی ءِ کہ اینو الحمدللہ ایران نا صدر و کنا بھاز ہنین آ ایلم ڈاکٹر مسعود پزشکیان پاکستان آ بننگ ءِ۔ او پارے کہ ببو اینو ایران نا صدر نا پبی و جم و جوش اٹ بخیر کننگ کن تیاری کین۔ و تین پہ تین نا ساڑی جھیڑہ غاتے اسہ کنڈ تخن۔