حکومت بزکو کہولی تعلیم نا شون تننگ کن عملی گام گیج آ باور کیک،وزیر اعلیٰ میر سرفراز بگٹی

وزیراعلیٰ بلوچستان میر سرفراز بگٹی پارینے کہ صوبائی حکومت بڑزکو کہولی تعلیم نا شون تننگ، یونیورسٹی تا واکداری اٹ جوانی و طالب علم آتے پوسکن آ دور انا خواست آتتون ہم گرنچ تعلیمی آسراتی تا فراوانی کن عملی و بھرمی گام گیج آتیا باور کیک۔ دا خیال آتا درشانی ءِ او یونیورسٹی آف مکران پنجگور نا شعبہ کمپیوٹر سائنسز ءِ پیش بروک ویل آتا ایسر و ہیلکاری آب انا جوانی نا بابت اڈ ہلوک اسہ بڑزکو کہولی دیوان اسے نا کماشی ءِ کرسا کرے۔ دیوان اٹی شعبہ کمپیوٹر سائنسز نا ویل آتا دمدستی و مدامگی ایسر نا بابت اہم فیصلہ کننگا۔دیوان اٹی صوبائی وزیر تعلیم راحیلہ حمید درانی، چیف سیکرٹری بلوچستان شکیل قادر خان، ایڈیشنل چیف سیکرٹری ڈٹ بندی و شونداری زاہد سلیم، سیکرٹری ہائر ایجوکیشن محمد صالح بلوچ بشخ ہلک، وخت اس کہ یونیورسٹی آف مکران پنجگور نا وائس چانسلر پروفیسر ڈاکٹر سعادت بلوچ ویڈیو لنک انا کمک اٹ بشخ ہلک۔ دیوان اٹی فیصلہ کننگا کہ یونیورسٹی آف مکران پنجگور نا شعبہ کمپیوٹر سائنسز اٹی دمدستی وڑ اٹ پی ایچ ڈی کہول انا چیئرمین و اِرا تعلقدار لیکچرار تعینات کننگ کن سمری ءِ زو راہی کننگے۔ اوڑتون اوار شعبہ ٹی مدامگی و باقاعدہ ہیلکاری کارندہ غاتا تعینات کننگ ءِ ہم زوت آن زوت پک کننگک تانکہ ہیلکاری ریسہ ءِ بھرمی و گچین جوڑ کننگ مرے۔ وزیراعلیٰ میر سرفراز بگٹی دیوان نا وخت آ پارت کرے کہ یونیورسٹی تیٹی تعلیمی آب انا جوانی و خاص وڑ اٹ انفارمیشن ٹیکنالوجی و کمپیوٹر سائنس کون آ اہم آ بشخ آتے سوگو کننگ کن کل المی گام گیج آتے دمدستی پورو کننگے۔ او پارے کہ بلوچستان نا ورناتے پوسکن آ علم آن شپ کننگ صوبائی حکومت نا اولیت آتے اٹی اوار ءِ و دا مسخت نا دوئی کننگ اٹی ہچ ءُ وڑ اسے نا رے تے یا ڈیوالئی ءِ سگنگ مفک۔ حکومت تعلیمی ادارہ غاتے پیش بروک ویل آتا مدامگی ایسری کن عملی و آخبتی اصلاحات آ عمل کننگ اٹی ءِ۔