نوشکے ٹی کورونا نا اولیکو کیس مون آ بس، ناجوڑ کے پی کے نا سے
Get real time updates directly on you device, subscribe now.
نوشکے (تلار حوالکار) نوشکے ٹی کورونا نا اولیکو کیس مون آبس‘ ناجوڑ نا تعلقداری تبلیغی جماعت آن ءِ ہراکہ کینٹ خیبر پختونخوا نا رہینگوک اسے۔ حوال نارد اٹ ڈسٹرکٹ ہیلتھ آفیسر صاحبزادہ ڈاکٹر فرید احمد میڈیا نا نمائندہ غاتتون نوشکے ٹی اولیکو کیس انا مون ءِ بننگ ءِ پک کرسا پارے کہ منہ دے مست تبلیغی جماعت آن تعلقدار بندغ آتا ٹیسٹ انا نمونہ ءِ ہلنگاسس‘ تبلیغی جماعت نا ایلو بندغ آتا ٹیسٹ منفی بس و اسہ ٹیسٹ انا رزلٹ مثبت مس ہراکہ دوشنبے نا دے رسینگا‘ کورونا غان ز ہمی 70 سال انا ناجوڑ بصیراللہ ولد امین الحق نا تعلقداری کینٹ خیبر پختونخوا غان ءِ‘ ٹیسٹ مثبت بننگ آ زہمی بندغ ءِ درمان کن کوئٹہ غا گدریفنگا۔ داکان بیدس کلی قاضی آباد گول مسجد ہراکہ مسجد بلال نا پن اٹی ءِ ‘ علاقہ ءِ سیل کرسا اسکریننگ نا بناءِ کننگانے‘ نوشکے ٹی اولیکو کیس انا مون آبننگ آن نوشکے ٹی خلیس وبھیم تالان مس۔