حکومت کیسکو نا پک زرتس آتے تفننگ اٹی ءِ، ملک نصیر شاہوانی

کوئٹہ : بلوچستان زمیندار ایکشن کمیٹی نا چیئرمین بلوچستان نیشنل پارٹی نا پارلیمانی لیڈر ملک نصیر احمد شاہوانی پارینے کہ بنجاہ و صوبہ کیسکو ءِ تروک آ واجبات آتے تننگ اٹی افس۔ او بجلی بند کرسا بلوچستان نا کشارگر و اُلس نا زرگزرانی خون ءِ کننگ انگ ءِ۔ ہرانا نن کس ءِ موکل تفنہ۔ صوبہ ءِ 300میگا واٹ بجلی ترسا بے پڑو لوڈ شیڈنگ کننگ انگ ءِ۔ بجلی نا بندی نا برخلاف بلوچستان نا 32 ضلع غاتیٹی 30 ہند آتیا کشار گرتے برانز کرسا روڈ بلاک کریر۔ بنجاہ نا غلط پالیسی و پدی کشنگ نا سوب آن بلوچستان ءِ ہِس انا ڈھیر اسے ٹی بدل کننگ کن صوبہ ٹی رہنگوک آ اُلس نا زرگزرانی خون ءِ کننگ انگ ءِ۔ بلوچستان نا پارلیمانی ڈل وزیراعظم تون اوڑدہی کرے و بنجائی وزیر خواجہ آصف نا کماشی ٹی توانائی نا بابت اٹ جوڑ انگا کمیٹی ءِ کوئٹہ آ بروئی ئس ارا ہفتہ گدرینگ انگ آن پد کمیٹی کوئٹہ غا بتو۔ دا وخت آ صوبہ ٹی 6 گھنٹہ کشاری فیڈر آتے بجلی فراوان کروئی ئس ولے 4 گھنٹہ بجلی تننگ اٹی ءِ۔ حکومت و ایلو کمیٹی ءِ پدی بننگ نا درشانی ءِ کرسا دانا بابت اٹ گام گیج کروئی تمک۔ تانکہ دا ویل انا پک بنداو آ ایسری اس کشنگے۔ وخت اس کہ صوبہ نا ویل انا پک بنداو آ ایسری اس کشنگے۔ وخت اس کہ صوبہ نا بندغ آتا کٹنگ نا وڑ کشت وکشار و مالداری تون گنڈوک ءِ۔ اسپیکر بلوچستان اسمبلی نا کماشی ٹی پارلیمان نا ڈل وزیراعظم میاں محمد شہباز شریف نا کنڈآن جتا کروک آ ڈل ہراٹی بنجائی وزیر خواجہ محمد آصف، خرم دستگیر، مصدق ملک، میر محمد ہاشم نوتیزئی و سیکرٹری توانائی تون اوڑدہی کرے و بلوچستان اٹ توانائی نا کاختی و بجلی نا مرغن انگا بندی و بے پڑو آ بجلی نا لوڈ شیڈنگ، بنجاہ و صوبائی حکومت نا کنڈآن کیسکو نا واجبات آتا عدم ادائیگی نا بابت اٹ معلومداری کرے۔ ویل آتے ایسر کننگ نا جاگہ غا پین خراب کننگ انگ ءِ۔ و کشارگر تیا مرغنی ءِ تنگ کرسا اوفتا زرگزرانی خون سوچوک ءُ ڈٹ اسے نا رداٹ کننگ انگ ءِ۔

(آن لائن)