فارن فنڈڈ گھڑی دُز اتون ہچ ءُ ورندی اس اف، مریم اورنگزیب

اسلام آباد : بنجائی وزیر حوالکاری و شینکاری مریم اورنگزیب پارینے کہ جج آتے کرینگ دھڑکو، عدالت آتیا جلہو، جوڈیشل کمپلیکس نا پرغ بٹ انت اکن؟ آخر انت اکن انتئے کہ فارن فنڈڈ گھڑی دُز اتون ہچ ءُ ورندی اس اف۔ سے شنبے نادے آ تینا ٹویٹ اٹی اوپارے کہ ہراتم عدالت آک پیشی کن منت کیرہ تاریخ آ تاریخ ایترہ تو داوڑ تومریک۔ اسہ بندغ اس آئین و عدالتی نظام آ جلہو گیر ءِ ہچ ءُ نوٹس اس اف۔ بنجائی وزیر حوالکاری و شینکاری مریم اورنگزیب پارینے کہ ”گھڑی دُز، توشہ خانہ دُز پیش مرے“ نا توار خلنگ انگ ءِ ولے عمران خان غیب ءِ، عمران خان پیش مف تو دزگیر کننگے، جیل ءِ پُر کننگ نا شوق ہم پورو مریک۔ سے شنبے نادے آ تینا بیان اٹی اوپارے کہ عدالت اَرفنگ ءِ کہ دوبہ دار ہرانگ ءِ؟ ورندی ملا”وخت انا پاننگ کپنہ“ عدالت اَریفنگ ءِ کہ دوبہ دار ہراوخت آ پیش مریک، ورندی ملا”عمران خان تون رابطہ مفننگ ءِ“ عدالت گھڑی دُز انا حاضری نا اَریفنگ ءِ ہراداتم اسکان پیش متنے، فارن ایجنٹ ضمانت کرفنگ بینکنگ کورٹ آ مہربانی کننگ ءِ، توشہ خانہ کیس اٹی فرد جرم بیٹ مروئی ءِ ہموکان ہم دا نروک ءِ، واہ بھئی واہ۔ مریم اورنگزیب پارے کہ نواز شریف مسڑتون اوار ہڑدے عدالت اٹ پیش مننگ کریکہ تو عمران خان، بشریٰ بی بی و فرح گوگی تون اوار انت اکن پیش مننگ کپک؟ عمران خان خنا! وخت بننگ آ ورندی تینٹ تروئی تمک، بشریٰ و گوگی ئسک ہم اودے اِلانو۔ اوپارے کہ گھڑی دُزو فارن ایجنٹ براہ راست جیل عدالت آ کاہک یا سیدھا عدالت۔ گھڑی دُز فارن ایجنٹ ورندی تننگ کہ توشہ خانہ ءِ انت اکن پُلا؟ خانہ کعبہ نا گھڑی ءِ انت اکن سودا کرے؟ بشریٰ بی بی توشہ خانہ نا ہیرہ غاتا ہار ءِ انت اکن سودا کرے؟ عدالت اٹ پیش مرسا ورندی ایتے۔ اوپارے کہ فارن ایجنٹ ورندی ایتے کہ خیرات نا پیسہ غاتے سیاست آانت اکن خلک؟ تینا ملازم آتا نجی اکاؤنٹ آتے منی لانڈرنگ کن انت اکن کاریم اٹ ایس؟ شوکت خانم ہسپتال نا خیرات نا پیسہ غاتے پرائیویٹ ہاؤسنگ سوسائٹی ٹی انت اکن خلک؟ ووٹن کرکٹ کلب آن لکھ آ ڈالر انت اکن ہلک؟ خیرات نا پیسہ غاتے سیاست آ انت اکن خلک؟ فارن فنڈنگ ءِ ملک انا برخلاف انت اکن کاریم اٹ ایس؟۔

(اے پی پی)