توشہ خانہ ریفرنس،عمران خان نا دزگیری وارنٹ جاری

اسلام آباد : توشہ خانہ ریفرنس نا فوجداری کارروائی کیس اٹ تحریک انصاف نا چیئرمین عمران خان نا دزگیری وارنٹ جاری کرے۔ عدالتی پرمان آن پد ہم عمران خان سیشن کورٹ اٹ پیش متو‘ ایڈیشنل ڈسٹرکٹ اینڈ سیشن جج ظفر اقبال دزگیری وارنٹ جاری کرے۔ سیشن جج ظفر اقبال ریمارکس تس کہ عمران خان ءِ وار وار وارخواہی ترسا کرین ولے او پیش متو۔ ڈسٹرکٹ اینڈ سیشن کورٹ اسلام آباد اٹ عمران خان نا برخلاف توشہ خانہ ریفرنس نا بابت فوجداری کیس انا سماعت مس‘ عمران خان نا وکیل علی بخاری وخت اس کہ الیکشن کمیشن ناکنڈآن سعد حسن ایڈووکیٹ پیش مس‘ سماعت ناوخت آ الیکشن کمیشن و عمران خان نا وکیل اسٹ ایلو آ ترند مسر۔ مسکوہی وزیراعظم عمران خان نا وکیل الیکشن کمیشن نا وکیل ءِ پارے کہ نی الیکشن کمیشن نا وکیل اُس تو وکیل مر ترجمان مننگ نا کوشست کپہ۔ علی بخاری عدالت ءِ پارے کہ عمران خان زرس مست لاہور آن پیش تمانے‘ او اینو جوڈیشل کمپلیکس نا اِرا عدالت اٹ پیش مریک‘ او اینو دا عدالت اٹ پیش مننگ کپک‘ سماعت نا وخت آ عمران خان نا وکیل سماعت ءِ 5 دے اکن پدبٹنگ نا خواست کرے تو جج ترند مرسا پارے کہ دا امر ءُ وڑ اسے‘ عمران خان 11 کورٹ اٹ پیش مننگ کیک‘ کچہری ٹی انتئے مفک۔ عمران خان جوڈیشل کمپلیکس اٹ پیش مریک داڑے بننگ کن وخت رسینگپک‘ دا ہرا وڑ ءِ داڑے ڈوہ بیٹ مروئی ءِ داڑے برے‘ ڈوہ بیٹ مس ولدا کاہے۔ جج انا ریمارکس آ علی بخاری پارے کہ خواجہ حارث دا کیس اٹ عمران خان نا وکیل ءِ‘ اینو دا عدالت اٹ پیش مننگ کن ساڑی مننگ کپک‘ دلیل تے بننگ آن پد عدالت عمران خان نا حاضری ءِ المی گونداسس‘ وقفہ غان گڈ دوارہ سماعت بنا کرے تو چیئرمین پی ٹی آئی عمران خان پیش متو تو عدالت عمران خان نا ضمانت مفروک دزگیری وارنٹ جاری کرے۔ عدالت پارے کہ عمران خان ءِ واروار وارخواہی ترسا کرین ولے او پیش متو‘ ہندا سوب آن دزگیری وارنٹ آ عملدرآمد کننگے۔ کیس انا سماعت ءِ 7 مارچ اسکان پد بٹنگا۔

(آن لائن)