چاگڑدی بدلی تا زہم آن بچنگ کن شجرکاری آ چکار کروئی تمک، وزیراعظم

اسلام آباد : وزیراعظم محمد شہباز شریف پارینے کہ بروک آ چین تے چاگڑدی بدلی نا اثرآتیان بچفنگ کن شجرکاری ءِ قومی نصب العین جوڑ کننگ نا گرج ءِ، دا وار نا ہتم اٹی مچ آ ملک شجرکاری مہم اس چلیفنگک ہراٹی 24 کروڑ آن زیات درخت خلنگک، زند انا غٹ بشخ آتیان تعلق تخوک آ بندغ آک زیات آن زیات دا مہم اٹی بشخ ہلیر، عالم دین و مشائخ آک الس اٹی دا بابت پامداری تالان کیر۔ داخیال آتا درشانی ءِ او سے شنبے نادے آ ہتم نا شجرکاری مہم نا بناء نا وخت آ گپ وتران کرساکرے۔ داکان مست وزیراعظم نیال اس خلسا رواں ہتم نا شجرکاری مہم نا بناءِ کرے۔ داوخت آ بنجائی وزیر چاگڑدی بدلی سینیٹر شیری رحمان، بنجائی وزیر تعلیم رانا تنویر حسین و بڑزکو کمامدارآک ہم ساڑی ئسر۔ وزیراعظم پارے کہ اینو نن مچ آ پاکستان اٹی شجرکاری مہم 2023ء نا بناءِ کننگ اٹی اُن، اینخو ہتم اٹی مچ آ ملک شجر کاری مہم اس چلیفنگک ہراٹی 24 کروڑ آن زیات درخت خلنگک، دا مچ آ ڈٹ بندی ٹی ننا وزیر موسمیاتی بدلی شیری رحمان و اونا ٹیم نا خصوصی است خواہی و خواری ءِ، پاکستان نا کل رقبہ مقابل جنگل آتا کچ بیرہ 5.45 درسد ءِ، ننے اوفتے ہلہلہ ئی بنداو تیا ودفوئی مریک، 2015ء ٹی نیشنل فارسٹ پالیسی نا سہرا کنا قائد مسکوہی وزیراعظم محمد نواز شریف نا کاٹم آٹے و اوکان پد پاکستان اٹی جنگل آتا بحالی نا اول سرآن بناءِ کننگا اوٹی ہچ ءُ دورائے اس اف کہ جنگل آک چاگڑد ءِ بدل کیرہ و راج و ملک اسے کن اوفتا اسہ اہم ءُ کڑد اسے، جان جوڑچاگڑد و بے شمار منفی اثرآتیان بچفنگ اٹی جنگل آتا بھلو اہم ءُ کڑد اس ادا کیرہ، پاکستان اٹی موسمیاتی بدلی نا نتیجہ ٹی تاریخ نا غٹ آن بھلا نوکاپ جنگل آتا اہمیت ءِ پین تالان کرینے، ساڑی آ نوکاپ اٹی بے پناہ جانی و مالی نسخان مس، لکھ آ مخلوق بے اُرا مس، 30 ارب ڈالر نا ننا زرگزران ءِ نسخان رسینگا، پاکستان اٹی شجرکاری ءِ قومی نصب العین جوڑ کننگ نا گرج ءِ، ننے بروک آ چین تا آخبت ءِ چاگڑدی بدلی نا منفی اثر آتیان رکھ کننگ کن قومی کہول آ نئے بیرہ عملی گام گیج آتا گرج ءِ بلکن تعلیمی ادارہ غاتیٹی ہم دا نا آگاہی ءِ پک کننگ نا گرج ءِ۔ داوخت آ سول سوسائٹی، وکیل و زند انا ہر بشخ آن تعلق تخوک آ بندغ آتیان فردا و اجتماعا خواست ءِ کہ دا مہم اٹی زیات آن زیات بشخ ہلیر، عالم دین و مشائخ آک ہم مدرسہ غاتیٹی درخت آتا اہمیت ءِ تالان کننگ نا بابت گام گیج کیر، نبی کریم صلی اللہ علیہ و آلہ وسلم نا زند و حدیث آتیان ننے درخت آتا اہمیت نا بارواٹی بے شمار درور ملک، جنگ انا حالیت اٹی ہم میوہ دار درخت آتا کاٹ کننگ ءِ منع کننگانے، پاکستان اٹی شاری آبادیک کنکریٹ نا جنگل جوڑ مرسا کننگ اٹی ءُ، ننے شار تیٹی ہم درخت و گرین ایریہ غاتا کچ اٹی ودکی کروئی مریک و براؤن ایریہ غاتے اخس کم کننگ کیر ہموخس چاگڑد کن بھاز جوان مریک۔ داڑکن قوم آن اپیل کیوہ کہ او دا شجرکاری مہم اٹی زیات آن زیات بشخ ہلیر و ببو نن غٹ اواری اٹ تینا بروک آ چین تا آخبت ءِ جوڑ کین و پاکستان نا الس نا خذمت کن تینے نن پورو و اجتماعی وڑاٹ وقف کین۔

(اے پی پی)