پاکستان و کایت نا نیام اٹ تعلقداریک ایلمی نا بنداو آٹو، حنا ربانی

اسلام آباد : وزیر مملکت خارجہ باندات حنا ربانی کھر پارینے کہ پاکستان و کویت نا نیام اٹ اسیجائی فائدہ غاتیا تالان سنگتی و ایلمی نا تعلقداری ءِ، ہڑتوم آ ملک آتا الس نا است پیڑی تیان اسہ ایلو کن چکک، پاکستان و کویت نا تعلقداری وخت اتون پین سوگو مننگ ءِ۔ داخیال آتا درشانی ءِ او سے شنبے نادے آ داڑے وزارت خارجہ ٹی پاکستان و کویت نا سفارتی تعلقداری تا 60 می سال دے انا رداٹ اڈ ہلوک دود آن تران کرسا کرے۔ دود انا بست وبند ءِ وزارت خارجہ و کویت نا سفارت خانہ اسیجائی وڑاٹ کریسر۔ دود اٹی وزیر مملکت حنا ربانی کھر آن بیدس پاکستان اٹی کویت نا سفیر ناصر عبدالرحمان جے المطیری، سیکرٹری خارجہ ڈاکٹر اسد مجید خان، اسلام آباد اٹی متعین درملکی سفارتکار، وزارت خارجہ نا آفیسر آک، پوریاگر، میڈیا نا نمائندہ و ایلو اہم شخصیت آک بشخ ہلکر۔ وزیر مملکت حنا ربانی کھر پارے کہ پاکستان اٹی تدوک آ سال بروک آ بھسکار نوکاپ اٹی کویت پاکستان نا کمک کن اہم ءُ کڑد اس ادا کرے۔ پاکستان و کویت تاریخ، جغرافیہ و است آتے اٹ گنڈوک ءُ۔ اوپارے کہ ہڑتوم آ ملک آتا الس نا نیام اٹ بھاز متکن، کڑمب و ایلمی تعلقداری ءِ۔ وزیر مملکت پارے کہ پاکستان و کویت نا 60 سال انا سفارتی تعلقداری نا دود آتا اینو بناکرینے۔ ہڑتوم آ ملک آک واپار و اقتصادی بشخ اٹی تعلقداری تے مون آ دیرہ، پاکستان اٹی قابل تجدید توانائی تون اوار ایلو بشخ آتیٹی کویت نا زرکاری اہمیت تخک، پاکستان و کویت سختی نا دے تیٹی اسہ ایلو تون تفینو۔ اوپارے کہ کویت 2005نا زمی جمب آن پد پاکستان اٹی کمکی کاریم تیٹی زیات آن زیات بشخ ہلک، پاکستانی فورس آک خلیجی جنگ آن پد کویت اٹی بارودی سرنگ آتا سفائی ٹی تینا جان تے ندر کرینو۔ حنا ربانی کھر پارے کہ کویت نا کنڈآن ویزاٹی آسراتی آن پاکستانی پوریا گر آتے فائدہ ملک، نن غٹ بشخ آتیٹی کمکاری ءِ مون آ دننگ نا خواہندار اُن۔ داوخت آ پاکستان اٹی کویت نا سفیر تران کرسا دود آن بشخ ہلوک آتے بخیر اٹ پارے۔ اوپارے کہ ہڑتوم آ ملک آتا نیام اٹ سفارتی تعلقداری نا 60 سال پورو مسنے۔

(اے پی پی)