گھڑی دز آن حساب آن پد گچین کاریک مریرہ، مریم نواز

ساہیوال : مسلم لیگ (ن) نا چیف آرگنائزر مریم نواز پارینے کہ اول اٹ وونٹ ءِ شرف رسینگک‘ عدل مریک‘ گھڑی دز عمران خان آن حساب ہلنگے اوکان گڈ ملک اٹ گچین کاریک مریرہ‘ دا گچین کاری تا سال ءِ گچین کاریک المی مریرہ و شیر بھلو گیشتری اسے اٹ سرسہب مریک‘ نواز شریف آن بیر ہلنگ کن پاکستان نا غریب الس نا دیگدان آ دیر شاغانگا‘ نواز شریف ملک آن دہشتگردی، کبینی و لوڈشیڈنگ ءِ چٹفے عمران خان ءِ اتوک آتے سما ئس کہ عمران خان نابود اسے اونا ہچ کڑدار اف ولے ولدا ہم ملک اٹ بیٹ کننگا و ملک ءِ تنکی تا گواچی کننگا۔ ملکی حالیت نا زموار پاناما بنچ واودے جوڑ کروک آک ءُ۔ ملک آئی ایم ایف تون تہو تخوک ءِ‘ گڑا عمران خان ءِ کتر کننگ و نوازشریف ءِ سَفائی کن تخنگانے؟ مسلم لیگ (ن) پاکستان تون مہر کیک نن تینا سیاست ءُ وختی نسخان تسن ولے ملک ءِ سری لنکا جوڑ مننگ آن بچفینا۔ساہیوال اٹ ورکرز کنونشن آن تران کرسا مریم نواز پارے کہ ساہیوال نا شیر و شیرنیک نواز شریف تون مہر کروک آتے کل ءِ مریم نواز سلام کیک‘ کنا ایڑھ زالبول آک داخس بھلو کچ اسے ٹی بسنو دا زالبول آتا اولیکو بھلا مچی ءِ ای اوفتے خراج تحسین پیش کیوہ۔ اوپارے کہ ساہیوال ڈویژن والاک نواز شریف نم تون مہر کیک نمے ہمو نوازشریف نا سلام ہرانا دور اٹ ارغ نا اِرا روپئی آ رسینگاکہ‘ ہرانا دور اٹ بورہ پنجا روپئی سیر ئس‘ نمے ہمو نواز شریف نا سلام ہرانا دور اٹ نت 35روپئی کلو رسینگاکہ‘ نمے ہمو نواز شریف نا سلام ہرانا دور اٹ سی 140روپئی کلو رسینگاکہ‘ نمے ہمو نوازشریف نا سلام ہرانا دور اٹ بجلی 11روپئی یونٹ ئسکہ‘ نمے ہمو نواز شریف نا سلام ہرانا دور اٹ پٹرول 65روپئی لیٹر رسینگاکہ‘ نمے ہمو نواز شریف نا سلام ہرا پاکستان ءِ بیست دو گھنٹہ نا لوڈشیڈنگ آن نجات ترفے۔ اللہ نا فضل اٹ نمے ہمو نواز شریف نا سلام ہرا پاکستان نا کنڈ کنڈ آن دہشتگردی نا لعنت ءِ چٹفے‘ نمے ہمو نواز شریف نا سلام ہرا آئی ایم ایف تون ڈیل کرے ولے الس آ کبینی ءِ ودفنگ کن الیتو‘ نمے ہمو نوازشریف نا سلام ہرا پوسکن آ پاکستان نا جوڑ کروک ءِ‘ نمے ہمو نوازشریف نا سلام ہرا پاکستان ءِ موٹروے، ایکسپریس و سی پیک تس۔ مریم نواز پارے کہ نواز شریف تانکہ دنیا ارے پاکستان ءِ ایٹمی پاور جوڑ کرے۔ نواز شریف ءِ نم و اللہ نا فضل اٹ مسہ وار وزیراعظم جوڑ مس و ہراتم ہم وزیراعظم مس پاکستان شون ہلک و نواز شریف ءِ ہراتم ہم حکومت آن کشنگا ملک تنکی تا باٹی ہنا۔ نواز شریف ہراتم آن ملک آن ہنانے‘ حکومت آن کشنگا دا ملک جوڑ مفننگ ءِ‘ ہراتم نواز شریف و پاکستان اسیجا بڑزا کارہ تونواز شریف و پاکستان اسیجا شیفی آ کارہ۔ نواز شریف ملک ءِ شونداری نا کسفر آ روان کرے۔

(آن لائن)