منی بجٹ آن اِرا ارب آخا، یک سد و شست ارب نا باریم تمک، سعید غنی

کراچی: حوالکاری وزیر سندھ سعید غنی پاینے کہ منی بجٹ آن اِرا ارب آخا، یک سد و شست ارب نا باریم تمک، دارو تا خام مال آ خراج اِلنگ ءِ چٹفنگ آن پد دوائی تا نہاد آتیٹی پین ودکی پک ءِ، سندھ اٹی اپوزیشن جماعت آتے بے ایمنی تالان کننگ و مخلوق ءِ جنگ تننگ نا ٹاسک تننگانے، بدمعاشی، داداگیری و دہشتگردی ءِ شرافت نا پن تروک آ وسیم اختر و اونا ایم کیو ایم ءِ دا صوبہ نا چنا چنا چاہک، کہ او انت اس ئسکہ؟ بنجائی حکومت نا برخلاف پیپلز پارٹی ملک گیر برانز کننگ اٹی ءِ، و سندھ اٹی نن تون برانزکن گورنر ہاؤس ءِ، اونا پیشن آ نن ہم برانز و دھرنا تننگ کینہ۔ د اہیت آتے او جمعہ نا دے سندھ اسمبلی میڈیا کارنر اٹی پریس کانفرنس کرسا کرے۔ دا وخت آ لالا رحیم و سردار نزاکت اسک ہم ساڑی ئسرہ۔ سعید غنی پارے کہ الس نا زی آ کبینی نا بمب انا کیہی دے تیان بنگنہ، درو وزیرخزانہ پارے کہ الس آ اِرا ارب روپئی نا باریم تمک، وخت اس کہ راستکی دادے کہ دا یک سد و شست ارب روپئی نا باریم اسے۔ او پارے کہ دارو تا خام مال آ خراج اِلنگ ءِ چٹفنگ آن کبینی پین ودک۔ او پارے کہ دا دعویٰ کیرہ کہ ملک شون ہلنگ اٹی ءِ۔ ولے اوفک صنعت نا گڑا تیا 112 ارب نا خراج خلکنو۔ سعید غنی پارے کہ بجلی، گیس، ڈالر، بورہ تون اوار ہڑدے ئی کاریم اٹ بروک کل گڑاک کبین مسنو۔ نُت، ڈیزل، پٹرول نا نہاد آتیٹی ودکی مسنے، و دانا پؤسٹ باریم الس نا جیب آتیا تمنگ اٹی ءِ۔ سعید غنی پارے کہ درو کابینہ منی بجٹ ءِ منظور کرے، او وخت آ ایم کیو ایم، جی ڈی اے و اونا جماعت آتا باسک آک دا دیوان اٹ ساڑی ئسرہ۔ ہرا الس نا دڑد تخنگ و السی خذمت گزار مننگ نا راگ کیرہ۔ گڑا اوفک اوڑے مخالفت انتئے کتوس؟ و داسہ تینا چم بازی تے کیرہ۔ اوفتے بیرہ موبائل فون کال آ پنچ درسد خراج آ اعتراض ءِ۔ السی ویل آتیان اوفک خن تے چَپ کرسا اسہ لوز اس ہم با غان کشپسہ۔

(آن لائن)