سندھ حوالکاری محکمہ بلوچستان نا تعلقدار افسر آتے ٹریننگ کن سنبرینگوک

کراچی : سندھ انا حوالکاری سیکرٹری عبدالرشید سولنگی تون بلوچستان نا ڈائریکٹر جنرل تعلقات عامہ اورنگزیب کاسی تدوک آ دے حوالکاری محکمہ نا دفتر سندھ سیکریٹریٹ اٹی اوڑدہی کرے۔ دا وخت آ ڈائریکٹر جنرل تعلقات عامہ سندھ غلام الثقلین، ڈائریکٹر پریس انفارمیشن سلیم خان و ڈائریکٹر ایڈمنسٹریشن و اکاؤنٹس اخترعلی سورہیو اسک ہم ساڑی ئسرہ۔ دیوان اٹی ڈائریکٹر جنرل اطلاعات حوالکاری محکمہ سندھ انا چندی بشخ آتا بابت ڈی جی تعلقات عامہ بلوچستان ءِ سرجم حوال تس۔ اوڑدہی ٹی تین پہ تینی است خواہی نا کیہی باندات آتیا شرہ مس۔ دا وخت آ حوالکاری سیکرٹری سندھ عبدالرشید سولنگی پارے کہ سندھ و بلوچستان نا حوالکاری محکمہ غاتا نیام اٹ گچین رابطہ غاتا کمک اٹ حکومتی کارکڑد ءِ پیدوار کننگ نا بابت ہڑتوم آ صوبہ غاتا افسر آتے معلومداری تا ہڷ تس آن بھلو فائدہ اس مننگ کیک، و حالی حوالی نا رد چرجوئی ءِ برجا تخنگ المی ءِ۔ او پارے کہ حوالکاری محکمہ سندھ بلوچستان نا افسر آتے حوالکاری نا بشخ اٹی پوسکن آ خواست آتتون ہم گرنچ کننگ کن ٹریننگ نا وارخواہی تیٹی کمک تننگ کیک۔ حوالکاری سیکرٹری سندھ عبدالرشید سولنگی پارے کہ پوسکن آ سال 2022ء نا بنا ٹی حوالکاری محکمہ سندھ دا رد اٹ اسہ بین الصوبائی کانفرنس اس ہم اڈ تننگ نا گیگ کرینے، تاکہ مون تروک ویل آتا بابت اسیجائی ءُ کسر اس کشنگ مرے۔ او ڈائریکٹر جنرل تعلقات عامہ و سیکرٹری انفارمیشن بلوچستان ءِ دا کانفرنس اٹ بشخ ہلنگ نا سلہ خلک۔ اوڑدہی نا گڈ سر اٹ حوالکاری سیکرٹری و ڈائریکٹر جنرل تعلقات عامہ سندھ انا کنڈ آن ناظم اعلیٰ تعلقات عامہ بلوچستان اورنگ زیب کاسی ءِ سندھ انا ربیدگی ٹیکی اجرک و سندھی ٹوپ تننگا۔

(خ ن)