اپوزیشن تار تار مسنے، مخالف آتتون سیاست کن ہچ سلتنے، چوہدری فواد

لاہور: بنجائی حوالکاری وزیر چوہدری فواد حسین پارینے کہ اپوزیشن تار تار مسنے، مخالف آتتون سیاست کن ہچ سلتنے، خواجہ آصف ہراتم وزیر دفاع ئس تو اقامہ غا دوبئی نا کمپنی تیان تنخواہ ہلککہ، اینو ننے پاننگ ءِ کہ ملکی سلامتی ءِ گڑتی پلویڑ کرینے۔ نواز شریف و زرداری نا ہلوک آ وام تا پد ءِ ننے پر کروئی تمنگ ءِ، فنانس بل نا وخت آ اپوزیشن سرکڑدہ غاک اسمبلی ٹی ساڑی ہم اَلوس۔عمران خان پاکستان ءِ ریاست مدینہ نا وڑ جوڑ کننگ کن پرعزم ءِ، ننا سیاست، زرگزران و دفاع سوگو ءِ، میڈیا تون ہیت و گپ کرسا چوہدری فواد حسین نا پاننگ ئس کہ پاننگاکہ کہ پی ٹی آئی نا 29 بندغ اپوزیشن تون حالی حوالی اریر، ولے سما تما کہ مچ آ اپوزیشن پی ٹی آئی تون حالی حوالی ءِ۔ پاکستان نا الس اوفتے جوان چاہک، دا تار تار مروک ءُ بندغ ءُ۔ الس اوفتا حالیت ءِ خنانے۔ مسہ سال اٹی نن 32 ارب ڈالر وام پدی تسنن، بروک آ اِرا سال اسکان جم وڑ اٹ ننے 55 ارب ڈالر وام پدی تروئی ءِ۔ بنجائی حوالکاری وزیر پارے کہ اگہ اینو عمران خان وزیراعظم متوکہ تو پاکستان بینک کرپٹ مسوسس۔ عمران خان و تحریک انصاف نا زرگزرانی ٹیم وام تیان پد ہم پاکستان ءِ تیان نت تیا سلفیر۔ اپوزیشن والاک نرانو۔ اوفک پدی پڑ آ تو بریر، گڑا اوفتتون ہیت مریک۔ عمران خان اپوزیشن ہم کرے نشان تس۔ دا بیوس آتیان تو اپوزیشن ہم مفننگ اٹی ءِ۔ چوہدری فواد حسین پارے کہ سیاست کننگ نا حق ہر اسٹ ءِ دوئی ارے، نن خوانہ کہ پی پی پی و ن لیگ قومی سیاست کیر۔ پی پی سندھ انا مخلوق ءِ جانجوڑی کارڈ آن مُر تخانے۔ پیپلز پارٹی بیرہ سندھ کارڈ گوازی کننگ خواہک۔ پیپلز پارٹی داڑے برے، جلسہ کے، دہ مرلہ نا اُرا ٹی اونا جلسہ مریک۔ او پارے کہ خیبر پختونخوا، کشمیر، گلگت بلتستان آن پد اینو پنجاب نا شاری تے جانجوڑی کارڈ نا آسراتی دوئی مسنے۔ 10 لکھ روپئی اسکان ہر خاہوت درمان نا آسراتی دوئی کننگ کیک۔ اینو آن دا آسراتی لاہور ڈویژن ءِ فراوان کننگانے۔ 20 تاریخ اسکان پنجاب نا کل ڈویژن آتیٹی دا آسراتی فراوان کننگک۔ بلوچستان جانجوڑی کارڈ کن امنا کرینے۔ بد بختی نا ہیت اسے کہ سندھ دا ڈٹ اٹ بشخ ہلنگ خواپک۔ وزیراعلیٰ سندھ تینا فیصلہ نا اول سر جاچ ءِ ہلے، و دا عظیم انگا ڈٹ اٹ اوار مرے۔ چوہدری فواد حسین پارے کہ بروک آ تُو آن راشن پروگرام ہم بنا کننگک۔ فنانس ایکٹ اٹی ترمیم نا بنداوی مسخت پاکستان اٹی ٹیکس کلچر نا شون تننگ ءِ۔ 343 ارب روپئی نا سیلز ٹیکس اٹی رعایت آن نئے بیرہ 71 ارب روپئی ٹیکس انا پیسہ ءُ، بلکہ ایلو کل ریفنڈ و ایڈجسٹ ایبل ٹیکس ءُ۔ چوہدری فواد حسین پارے کہ درآمدی گڑا تیا ٹیکس برجا سلک، وخت اس کہ ایلو کل گڑا تیان خراج ءِ چٹفنگانے۔ شوکت ترین فلم انڈسٹری ءِ بچفنگ کن پبی ءُ گام گیج کرینے۔ سینما نا مشینری و فلم پروڈکشن آن خراج اینک کننگانے۔ درملکی ڈرامہ و فارن ایکٹر آتا سوب آن ننا فنکار آک بے روزگار مننگ اٹی ءُ، فارن مواد آ خراج خلنگ آن فائدہ ہندی فنکار آتے مریک۔ فلم و ڈرامہ پاکستان نا بیانیہ ءِ پیش کننگ اٹ اہم ءُ کڑد ادا کیرہ، دانا بحالی المی ءِ۔

(آن لائن)