ہچ ءُ ایشین ٹائیگر اس مدینہ نا ریاست تون بریبر بننگ کپک، عمران خان

0

Get real time updates directly on you device, subscribe now.

لاہور : وزیر اعظم عمران خان پارینے کہ نن ہمو کسر آ گام کننگ اُن ہرا قوم انا عظمت نا کسر ءِ، وخت اس کہ ہچ ءُ ایشین ٹائیگر اس مدینہ نا ریاست تون بریبر بننگ کپک، پاکستان اٹی چپ ءُ انقلاب اس بننگ اٹی ءِ، کم کٹیا والا بندغ ءِ اُرا تفنگ کن وام تننگ نا بنا مسنے، 20 لکھ خاہوت ءِ بے سود وام تننگانے، ملک اٹی نجی بشخ داسہ تینٹ ہسپتال جوڑ کیک، مچ آ پاکستان اٹی ہسپتال آتا چر اس بنا کیک۔ وخت پاہک کہ میٹرو ٹرین ملک ءِ زیات فائدہ رسیفے یا جانجوڑی کارڈ؟ اینو اسکان اسہ حکمران اس ہم جانجوڑی کارڈ انا کچ ءُ بھلو گام اس ہرفنگ نا گیگ کتنے، دا ہیت آتے وزیراعظم عمران خان لاہور اٹی جانجوڑی کارڈ بشخنگ نا دود آن تران کرسا کرے۔ وزیر اعظم وزیر اعلیٰ پنجاب و جانجوڑی وزیر ڈاکٹر یاسمین راشد نا ٹیم انا ستا ءِ کرسا پارے کہ داخو بھلو فیصلہ کس کننگ کپک، نئے پاکستان نا مون نا حکومت آتیان کس دن ءُ فیصلہ اس کننگ کرینے۔ او پارے کہ ہراتم ای برطانیہ غا ہناٹ، تو ای اولیکو وار آسودہ ریاست اس خناٹ، آسودہ ریاست ہمو مریک ہرا مخلوق تون کمک کیک۔ آسودہ ریاست لس بندغ نا بنداوی گرج آتے پورو کیک، او دا خواپک کہ خاص ءُ تپہ اس شون ہلے۔ او خواہک کہ کل شون ہلیر۔ او پارے کہ دا وڑ ءُ ریاست اس اولیکو وار نبیؐ جوڑ کرے۔ اولیکو وار اسہ ریاست اس نزور تپہ نا زمواری ءِ ہرفیسس، اگہ اونا مَٹ اس نم دنیا ٹی خنانرے تو مسلمان ملک اس مفرو، بلکہ راستکی دادے کہ داسہ یورپی ملک آک ہمو کسر ءِ ہرفینو۔اوڑے تینا نزور تپہ نا پورو زمواری ءِ ریاست ہرفینے۔ او پارے کہ ہراتم اللہ پاک ننے پرمان کیک کہ نبیؐ نا کسر ءِ ہرفبو، تو داٹی ننا فائدہ اودیم تخنگانے۔ ہرا قوم مدینہ نا ریاست و نبیؐ نا سنت آ گام کیک، تو شون ہلیک۔ وزیر اعظم پارے کہ دیکی ملک آتیٹی وسیلہ غاک کم ءُ، ولے اوڑے شونہالی زیات ءِ۔ او پارے کہ نبیؐ نا خطاب رحمت اللعالمین ئس، رحمت المسلمین اَلوکہ، یعنی اونا کسر آ ہرکس ءِ ہرکس کہ ہرفے او شون ہلیک۔ او پارے کہ پاکستان اٹی کل آن زیات روچہ توننگک، نماز خواننگ ہم بھاز ءِ، ننا تبلیغی جماعت آک ہندن بھلو مچی کننگ ءُ، کہ اوفتا مٹ رسینگپک، ولے نن نبی نا کسر ءِ ہرفپنہ۔ او پارے کہ پنجاب نا حکومت و نن ہرا گام گیج آتے کننگ اُن، نن ہمو کسر ءِ ہرفینن ہرا قوم انا عظمت نا کسر ءِ۔ داڑے حکمران آک پارہ کہ نن پاکستان ءِ ایشین ٹائیگر جوڑ کننگ خوانہ، تو مگہ ایشین ٹائیگر اس مدینہ نا ریاست تون بریبر بننگ کیک؟ او پارے کہ نن ہمو کسر ءِ ہرفنگ خوانہ ہراڑکن پاکستان جوڑ مسوسس۔ اگہ پاکستان دا کسر ءِ ہرفتو، تو ہندوستان نا مخلوق تون بھلو درو اس مریک۔ دا ہمو بندغ آتتون درو اس مرو ہرافتے سما ئس کہ اوفک پاکستان نا بشخ اٹ بفسہ، ولدا ہم اوفک پاکستان کن وونٹ تسر۔ او پارے کہ تران تیٹی نن دا ریاست نا بھاز پن ءِ ہلینہ، ولے عملی وڑ اٹ ہچ اس کتنن۔ وزیر اعظم عمران خان اسہ وار ولدا عثمان بزدار و یاسمین راشد نا کارکڑد نا ستا ءِ کرسا پارے کہ کم و وَد چارسد ارب روپئی نا خڑچ اٹ ہرا صحت انشورنس رسینگک، اونا رد اٹ وخت پاہک کہ نم ہرا کاریم ءِ کرینو، او میٹرو ٹرین و ایلو ڈٹ آتا مون اٹ قوم ءِ اخس فائدہ ایتک۔

(آن لائن)

Get real time updates directly on you device, subscribe now.

Leave A Reply

Your email address will not be published.