پیشن ملک رہینگوک آپاکستانیک ملک انانہادی میرات آک ءُ،وزیراعظم محمد شہباز شریف

وزیراعظم محمد شہباز شریف پیشن نا ملک رہینگوک آ پاکستانی تے ملک انا نہادی میرات گوندسا پارینے کہ اوفتے ہر وڑنا آسراتی تا فراوانی حکومت نا اولیت ءِ، کیو آر کوڈ انا کمک اٹ پیشن نا ملک رہینگوک آ پاکستانی تا غاو تے نوشتہ کننگ نا ڈیجیٹائزیشن نا بابت آگاہی ودی کننگے۔ او دا خیال آتا درشانی ءِ پیشن ملک پاکستانی تیکن سفارت خانہ غاتے ٹی آسراتی تیٹی ودکی، دستاویز آتا پک کننگ نا عمل نا ڈیجیٹائزیشن، غاو تا عمل ءِ پین آسان جوڑ کننگ و پیشن ملک آن پاکستان اٹی چندی کاریم و زرتس تے کن ڈیجیٹل نظام نا بابت وزارت خارجہ نا حوال نا وخت آ کرے۔ وزیراعظم آفس نا میڈیا ونگ انا کنڈآن پنچ شنبے نادے آ جاری بیان نا رداٹ وزیراعظم نا کماشی ٹی دیوان اٹی وزارت خارجہ، چندی ملک آتیٹی پاکستان نا سفیر، وزارت داخلہ، ایف آئی اے، وزارت آئی ٹی و تعلقدار بڑزکو عہدیدار آک دا بابت سرجم حوال آتیان وزیراعظم ءِ معلومداری تسر۔ وزیراعظم پارے کہ پیشن ملک رہینگوک پاکستانیک ننا نہادی میرات آک ءُ ہرافتے ہر وڑ انا آسراتی تا فراوانی حکومت نا اولیت ءِ۔ وزیراعظم ءِ پاننگا کہ پیشن ملک پاکستانی تا آسراتی کن پاور آف اٹارنی و میرات نا بہا و ہلنگ نا نظام و دستاویز آتا پک کننگ نا عمل ءِ آسان جوڑ کننگ کن کیو آر کوڈ درستی راستی کرفنگانے۔ وزیراعظم پارے کہ کیو آر کوڈ انا کمک اٹ پیشن ملک رہینگوک پاکستانی تا غاو تا نوشتہ کننگ نا ڈیجیٹائزیشن ستاکڑزک۔ سفارت خانہ غاتے ٹی اودے خلسا رسینگ اٹ ودکی کننگے، کیو آر کوڈ انا کمک اٹ غاو تا نوشتہ کننگ نا بابت پیشن ملک رہینگوک پاکستانی تیکن خاص آگاہی مہم اس چلیفنگے تانکہ زیات آن زیات بندغ دا نظام نا کمک اٹ غاوتے نوشتہ کرفنگ کیر۔ وزیراعظم ءِ پاننگا کہ شاری تا آسراتی کن وزارت خارجہ نا دفتر اسلام آباد اٹی نن نا شفٹ انا زوت آتے اٹ بناءِ کننگانے۔ ہنداوڑ دستاویز آتا پک کننگ نا آسراتی ءِ آسان خدمت مرکز اسلام آباد اٹی ہم درستی راستی کرفنگانے۔ داڑان بیدس کورئیر نا کمک اٹ پک کننگ نا عمل ءِ درستی راستی کرفنگ تون اوار اوار ہائیر ایجوکیشن کمیشن، انٹر بورڈ کوآرڈینیشن کمیشن، نادرا و نیشنل پولیس بیورو نا ڈیٹابیس تون اوار کننگانے ہراڑان پک کننگ نا عمل پین ترند مسنے۔ دیوان ءِ پاننگا کہ اپوسٹائل نا نظام نا رداٹ پک کننگ نا عمل ءِ ون اسٹیپ کننگانے، بروک آ ریسہ ٹی دا مچ آ نظام ءِ پورو وڑ اٹ ڈیجیٹائز کننگ آ کاریم ترندی اٹ برجاءِ۔ دا بابت این آئی ٹی بی نا کمک اٹ موبائل ایپلی کیشن تیار کننگ انگ ءِ ہراٹی برتھ/ڈیتھ سرٹیفکیٹ، میرج رجسٹریشن سرٹیفکیٹ، فیملی رجسٹریشن سرٹیفکیٹ پین دستاویز آتا ہم ڈیجیٹل نظام نا کمک اٹ پک کننگ پک مریک۔ دیوان اٹی نائب وزیراعظم و وزیر خارجہ سینیٹر محمد اسحاق ڈار، بنجائی وزیراحد خان چیمہ، عطاء اللہ تارڑ، چوہدری سالک حسین، شزہ فاطمہ خواجہ، وزیر مملکت عون چوہدری، خصوصی کمکار طارق باجوہ و تعلقدار بڑزکو عہدیدار آک بشخ ہلکر۔