کیچ اٹ فتنہ الہندستان نا دہشت گرد آتا شش مزورکار خلنگ نا مذمت ءِ کینہ،وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی ضلع کیچ اٹی فتنہ الہندوستان تون تعلقداردہشت گرد آتا دو اٹ شش بے گناہ مزورکار آتا بیدادی اٹ خلنگ نا سخت انگا لوز آتے ٹی مذمت ءِ رکسا پارینے کہ کودک آ شاری تے شست کروک آک انسانیت، بلوچستان و پاکستان نا دشمن ءُ۔ وزیراعلیٰ تینا مذمتی بیان اٹی پارے کہ شہید مروک مزورکار آک اسہ قوم، زبان یا صوبہ اسے نا اَلوس بلکن پاکستان نا شاری ئسر۔ دہشت گرد آک پنجابی تے آخا بلکن بے گناہ پاکستانی تے کسفینو۔ او پارے کہ دا است ہسون واقعہ ءِ قومیت نا رنگ تننگ دہشت گرد آتا لغور آ ارادہ غاتے سوگو کننگ نا کوشست اسے۔ میر سرفراز بگٹی پارے کہ بلوچ قوم انا روایت مہمان نوازی، ایلمداری، شرف و انسانیت نا احترام آ تالان ءِ‘ دوخورک و بے گناہ شاری تا خلنگ بلوچ روایت نا بشخ اس اف بلکن فتنہ الہندوستان نا دہشت گرد آتا سفاک سوچ انا درشانی ءِ کیک، ہرافتا مسخت بلوچستان و پاکستان اٹی بے ایمنی‘ خلیس و بے چیٹی تالان کننگ ءِ۔ وزیراعلیٰ پیدوار کرے کہ فتنہ الہندوستان نا دہشت گرد آک بلوچستان نا شونداری، امن و قومی سیوت نا دشمن ءُ و ریاست دا وڑ انا بندغ و اوفتا کمک کار آتا برخلاف پورو واک اٹ کارروائی تے برجا تخک۔ او پارے کہ کودک آ پاکستانی تا دتر نا ہر پڑی نا حساب ہلنگک و دہشت گرد آتے کانود نا مون آ سلفنگک۔ میر سرفراز بگٹی شہید آتا خاہوت آتتون است ہسونی و ہمدردی نا درشانی ءِ کرسا دعا کرے کہ اللہ تعالیٰ شہید آتے جنتی کے‘ ٹھپی تے زوت دراخ جوڑ و پد خاہوت آتے صبر انا توفیق ایتے۔