کس منے یا منپ، سسٹم بھس مسنے، خرابی تا اینک کننگ کن کل ءِ اوار تولوئی تمک،بنجائی وزیر داخلہ محسن نقوی

بنجائی وزیر داخلہ محسن نقوی پارینے کہ کس منے یا منپ ساڑی سسٹم بھس مسنے۔ ساڑی نظام نا خرابی ءِ اینک کننگ کن کل سیاسی پارٹی تے اوار تولوئی تمک، واکداری تے شیفکو کہول آ گدریفنگ، پوریاگر، صنعت کار و کاروباری تپہ ءِ انتظامی کہول آ اتوئی تمک۔ اگر سسٹم ءِ جوان کتون تو دہ سال آن پد ہم ہندن تولوک مرون وخت اس کہ کس اس کاکروچ پارٹی آنبار داڑے سسٹم ءِ چپی کننگ کن بش مریک۔ اکنامک سمٹ آن تران کرسا وزیر داخلہ پارے کہ مسٹ و نیم سال آن سیاست اٹی مننگ آن پد ہم ہچ ءُ سیاسی تران اس کتنٹ ولے اینو زرس سیاسی تران کننگ نا بیوس مسنٹ۔ او پارے کہ اینو کل صوبہ غاتا نمائندگی کروک آ ہرافک داڑے تولوک ءُ او پاننگ اٹی ءُ کہ پاکستان اٹی دا ہم مننگ کیک و دا وڑ ہم مننگ کیک، حالانکہ پاکستان ہرا حالیت اٹی ءِ اونا زموار نن کل اُن۔ او پارے کہ کس منے یا منپ ای دا ہیت ءِ کیوہ کہ ملک انا ساڑی سسٹم بھس مسنے۔ اگر نن دا راستکی ءِ سرپند متون تو نن دہ سال آن پد ہم ہندا تران کننگ اٹی مرون۔ اللہ کرم کرینے نن پن جہانی کہول آ مونی ہنانن ولے ننا تہہ انا حالیت آک اسل جوان افس۔ او پارے کہ داڑے تولوک آ بندغ آک ہم دا نظام نا خرابی ٹی بریبر نا شریدار ءُ انتئے کہ حکومت جوڑ مننگ آن مست سیاستدان آتے ہرا فنڈنگ بزنس کمیٹی نا کنڈ آن کننگک اوڑان کس نمن مننگ کپک۔ او پارے کہ دا نظام ءِ ٹھیک کننگ کن جمہوریت ءِ ٹھیک کروئی مریک۔ ہرا دے آ نم فیصلہ کریرے کہ دا نظام ءِ ٹھیک کروئی ءِ ہمو دے دا نظام ٹھیک مریک۔ دا نظام اٹی ہر گڑا خراب ہم اف۔ او پارے کہ لس بندغ نا غرض بیرہ بنداوی آسراتی تا فراوانی اسکان مریک ہرا اوفتے سر مفننگ اٹی ءُ۔ او پارے کہ ہراتم اسکان کاروباری تپہ ایڈمنسٹریٹو یونٹ ءِ ہرفسا اسیجا مفک ہمو وخت اسکان ویل آک ایسر مفسہ۔ او پارے کہ ملک انا ورنا تپہ بیرہ اسہ گڑا اسے نا خواہندار ءِ کہ اودے میرٹ آ روزگار رسینگے‘ اگہ نن اونا دا استخواہی ءِ پورو کننگ کتون تو داڑے ہم کاکروچ مچ مرو و سسٹم ءِ چپی کننگ اٹی ہُرے مفرو۔ ورناک نمے آن ہچ ءُ گڑاس خواپسہ او تینٹ اِرا ہزار ڈالر کٹیا کننگ کیرہ اوفتے بیرہ کسر نشان تننگ نا گرج ءِ۔ او پارے بنجائی حکومت نا دا حال ءِ کہ نن بجٹ ءِ منفی ٹی جوڑ کینہ، نن وام ہرفنہ ولے ملک ءِ ٹھیک کننگ اٹی افن دا ملک ءِ ننے ٹھیک کروئی ءِ۔ او کل سیاسی پارٹی تے اوار تولنگ نا سلاہ ترسا پارے کہ صوبہ غاتا سیاسی پارٹی تے ساڑی سسٹم اٹی راستی بدلی کن اسہ کمرہ اسے ٹی اوار تولوئی مریک اگہ سیاسی پارٹیک ویل آتیا یکجا متوس تو دا ملک انا ویل آک ختم مفسہ۔ او پوریاگر برادری نا سیاسی نظام اٹی بننگ نا خواست کرسا پارے کہ سیاسی نظام اٹی پوریاگر تینٹ انتئے بفننگ ءِ؟ نم خواست کیرے کہ ننے تینا علاقہ ٹی انتظامی یونٹ نا گرج ءِ‘ نمے تینا جند اکن بش مروئی تمک۔ ہرا لائخی نمے بزنس مین اٹی ءِ او پین کس اسے ٹی اف نم 10 ءِ 100 کننگ نا ہنر ءِ چارے۔ او پارے ننا ویل دادے کہ نن خوش مننگ نا جاگہ غا پانہ کہ دا گروپ داخس پیسہ انتئے کٹا۔ نن کل پانہ آبادی ٹائم بم ءِ ولے اودے توننگ کن نن انت کننگ اٹی اُن۔ اگہ ننا گلی دہ دہ وار جوڑ مننگ اٹی ءِ تو دا نظام ءِ نن ٹھیک انتئے کننگ اٹی افن۔ دا نظام اٹی بھاز جوانی ہم ارے ننے دا نظام نا خرابی تے اینک کروئی ءِ۔