موسمیاتی بدلی و ودوک آ چاگڑدی کچٹی نا رداٹ بیپا نا کارکڑد المی ءِ،نور پرکانی

سیکرٹری چاگڑد و موسمیاتی بدلی نور احمد پرکانی بلوچستان انوائرمنٹ پروٹیکشن ایجنسی (بیپا) نا دورہ نا وخت آ ادارہ نا کارکڑد، برجا ڈٹ، السی غاو، چاگڑدی کانود آتا عملدرآمد و مون تروک ویل آتا بابت سرجم حوال ہلک۔ دا وخت آ ڈائریکٹر جنرل ظہور بلوچ، ڈائریکٹر و ایلو افسر آک ہم ساڑی ئسر۔ نور احمد پرکانی پارے کہ موسمیاتی بدلی و ودوک آ چاگڑدی کچٹی نا رداٹ بیپا نا گچین کارکڑد المی ءِ و افسر آتا نزور کارکڑد یا غیر حاضری ءِ ہچ وڑ اٹ سگنگ مفک۔ او فضائی کچٹی، پولٹری و ڈیری فارم، سیوریج نا دیر اٹ کشت و کشاری و ایلو چاگڑدی خلاف ورزی تا برخلاف گچین کارروائی، فیکٹری و صنعتی یونٹ آتا پبی ءُ ڈیٹا اس جوڑ کننگ، السی غاو تیا مروک آ کارروائی تیا باقاعدہ چاروکی، ملازم آتا ہڑدے حاضری ءِ چیک کننگ، غیر ضروری اٹیچمنٹ آتے چٹفنگ و ادارہ نا مون تروک آ آسراتی تا کمتی ءِ مُرکننگ کن سفارشات تیار کننگ نا پارت کرے۔ او دا عزم انا درشانی ءِ کرے کہ ماحولیات نا رکھ و السی فائدہ غاتیکن ہر وڑ انا گام گیج کننگک، وخت اس کہ زالبول افسر و ملازم آتے رکھ و گچین چاگڑد فراوان کرسا اوفتا پبی کڑد دا کننگ کن وارخواہی تننگک۔