بروک آ اِرا تُو اکن ہم سود کچ ءِ 22 درسد برجا تخنگ نا پڑو

کراچی :  بینک دولت پاکستان سود انا کچ ءِ 22 درسَد برجا تخنگ نا پڑو کرے۔ گورنر اسٹیٹ بینک جمیل احمد کراچی ٹی پریس کانفرنس کرسا بروک آ اِرا تُو اکن مانیٹری پالیسی ناپڑو کرے‘ او پارے کہ بروک آ اِرا تُو اکن سود انا کچ ءِ 22 درسَد برجا تخنگانے۔ مانیٹری پالیسی کمیٹی نا رد اٹ بروک آ تُو تے ٹی کبینی ٹی کمتی مننگ نا گمان ارے‘بروک آ اِرا تُو اٹ کبینی نا کچ انا 20 آن 22 درسَد سلنگ ناگمان ارے وخت اس کہ بروک آ سال شونداری نا کچ ارٹ آن مسہ درسَد اسکان سلنگ نا گمان ارے۔ گورنر اسٹیٹ بینک پارے کہ امپورٹ آ خلوک رکھ آتے چٹفنگانے‘ جولائی ٹی زرمبادلہ نا کوڑیک 4.2 ارب ڈالر ودانو و دا وخت آ نن تون زرمبادلہ ناکوڑی تا کچ 8.2 بلین ڈالر ءِ‘ او پارے کہ دسمبر اٹ ننا زرمبادلہ نا کوڑی تا کچ جوان مریک‘ بروک آمالی سال انا تروک مچٹ وامک رول اوور مریرہ۔ حوال نارد اٹ زری پالیسی کمیٹی(ایم پی سی) تینا دیوان اٹ پالیسی ریٹ ءِ بدل کپننگ و 22درسَد آ برجا تخنگ نا فیصلہ کرینے‘ کمیٹی نوٹ کرے کہ تدوک آ دیوان آن پد زرگزرانی بے باوری کم مسنے وخت اس کہ پیشن نا بشخ انا کم وختی چیلنج آتا بھلو ہَد اسسکان مون ءِ توننگانے و زرکار آتا پت ودانے‘ ایہن تو کبینی نا سوب آن گڑتیک زیات مسنو ولے کمیٹی دا وخت اسکان مروک جم زری سختی ناگمانی پدتموک زہم‘ بجٹ اٹ اوار مالیاتی سوگوی و مالی سال 24ء اکن کچ انا شیف مننگ نا ہم ذکر ءِ کرے‘ خاص وڑ اٹ ایم پی سی نوٹ کرے کہ بروک آدوانزدہ تُو اٹ کبینی نا کم مننگ ناگمان ارے‘ ہراڑان مثبت حقی سود انا کچ انا درشانی مریک۔ گورنر اسٹیٹ بینک پارے کہ 26جون آ مروک ایم پی سی نادیوان آن پد کیہی اہم انگا باندات آک کم وختی زرگزران آ زہم شاغانو۔ اوّل، پاکستان آئی ایم ایف تون نُہہ تُو انا اسٹینڈ بائی معاہدہ (ایس بی اے) کرینے ہراڑان زرِمبادلہ نا کوڑی تا زیات مننگ ناکمک اٹ پیشن نا بشخ انا بابت دمدستی وڑ انا ویل آتا مون ءِ توننگ اٹ کمک رسینگانے۔

(آن لائن)