چین نا کمک اٹ پاکستان مشکل دور آن پیش تمانے، اسحاق ڈار

اسلام آباد :  بنجائی وزیر خزانہ و محصولات سینیٹر محمد اسحاق ڈار پارینے کہ چین نا کمک اٹ پاکستان مشکل دور آن پیش تمانے، مشکل دور اٹی چینی وزارت خارجہ، وزارت خزانہ، بینک آف چائنا و ایلو چینی بینک آتا کنڈآن پاکستان ءِ بے کچ کمک فراوان کننگانے، چین نا ون بیلٹ ون روڈ انیشی ایٹیو و سی پیک چین نا صدر شی جن پنگ نا عظیم گام و ڈیہہ و دنیا نا زرگزرانی آخبت ءِ، پاک چین سنگتی شاد آن ہنین، سمندر آن کڑمب وہمالیہ غان بڑز ءِ۔ دوشنبے نادے آداڑے پاکستان اٹی بینک آف چائنا نا ارٹ میکو برانچ نا بنائی دود آن تران کرسا وزیرخزانہ پارے کہ دا دود اٹی بشخ ہلنگ اوڑکن تاریخی ءُ موقع اسے، کنے یات ءِ کہ شش سال مست ہراتم بینک آف چائنا ءِ سویلی ایشیا و پاکستان اٹ تینا اولیکو برانچ ءِ ملنگ کن لیسن تننگاکہ تو دا لیسن ءِ ای بیجنگ اٹ بینک انا ہیڈ کوارٹر اٹ بینک انا صدر ءِ تسوسٹ۔ دا اسہ اتفاق اسے کہ اینو ہراتم بینک انا ارٹ میکو برانچ نا بنانا دود انا وخت آ او وزیرخزانہ ءِ۔ اسحاق ڈار پارے کہ پوسکن آ برانچ نا جوڑ کننگ ستاکڑزک و سدابہار پاک چین سنگتی نا درشانی ءِ۔ اوپارے کہ بینک آف چائنا ارٹ میکو برانچ نا بنانادود اٹی بینک انا گورنر، صدر و ایلو بڑزکو عہدیدار آتا بشخ ہلنگ ننکن خوشی نا سوب ءِ۔ بینک آف چائنا، آئی سی بی سی و چین نا ایلو بینک آک ننا عظیم مالیاتی شریدار ءُ۔ وزیرخزانہ پارے کہ پاکستان تدوک آ اسہ سال اٹی بے پناہ مشکل آتا گواچی ئس۔ دا مشکل دور اٹی چینی وزارت خارجہ، وزارت خزانہ، بینک آف چائنا و ایلو چینی بینک آک ننے بے پناہ کمک فراوان کریر ہراڑا نن اوفتا منت وارا ُن۔ الحمداللہ! نن مشکل دور آن پیش تمانن، زوت آتے اٹ ریٹنگ ایجنسی فچ پاکستان نا ریٹنگ ءِ گچین کرینے، پاکستان داسہ سوگوی اٹ زرگزرانی نمو نا کنڈا ہِننگ ءِ۔ وزیرخزانہ پارے کہ 5 سال مست پاکستان دنیا نا 24 می بھلا زرگزران ئسک، ننا زرگزرانی ٹک آک گچین ئسر، مچ آ دنیا ننا سفت ءِ کریکہ و منہ سال اٹی گروپ۔ 20 ٹی پاکستان نا اوار مننگ نا پیشن گوئی مسکہ۔ نن دا سفر نا دُوارہ بناءِ کرینن۔ وزیرخزانہ پارے کہ داہم اسہ اتفاق اسے کہ 2013ٹی ننا جماعت ہراتم گچین کاری تیٹی سرسہبی دوئی کرے تو ہمووخت انا چین نا وزیراعظم پاکستان نا دورہ ءِ کریکہ۔ سی پیک نا خیال ہندا ہوٹل اٹ اسہ دود اسے ٹی مون آ بسوسس۔ ہمووخت انا وزیراعظم محمد نواز شریف، ساڑی وزیراعظم محمد شہباز شریف و ای دا بابت گپ وتران کرین۔ ہمووخت انا چینی وزیراعظم و بڑزکو چینی کمامدارآک ننے پاریر کہ او ہراوڑ ننا کمک ءِ کننگ کیرہ و نن اوڑا اوفتا منت وار اُن۔ ہمووخت آ پاکستان اٹ 18 گھنٹہ لوڈشیڈنگ مسکہ، مسکوہی وزیراعظم محمد نواز شریف پاکستان اٹ چین نا توانائی نا ڈٹ و گوادر ءِ چین اتون ملفنگ نا ہیت ءِ کرے۔ داسی پیک نا بابت اولین گفت و شنید ئسک۔ اوکان پد وزیراعظم محمد نواز شریف چین نا دورہ ءِ کرے و سی پیک نا خیال ءِ عملی دروشم اس تننگا۔

(اے پی پی)