بلوچستان نا 35 ضلع ٹی ہفت دے ئی پولیو تور مہم یکم اگست آن بنا کیک
مہم اٹ پنچ سال اسکان نا وئی انا 25 لکھ99 ہزار آن زیات چنا ءِ پولیو آن بچفنگ نا پڑی کنفنگ نا سجفنگانے
Get real time updates directly on you device, subscribe now.
کوئٹہ : بلوچستان نا 35 ضلع ٹی 7 دے ئی پولیو تور مہم سَے شنبے یکم اگست آن بنا کیک‘ ہراڑکن تیاری تے پورو کننگانے۔ دا خیال آتادرشانی ءِ ایمرجنسی آپریشن سینٹر نا کوآرڈینیٹر سید زاہد شاہ تینا بیان اٹ کرینے‘ اوپارے کہ ہفت دے ئی پولیوتور مہم نا وخت آ پنچ سال انا وئی انا 25 لکھ99 ہزار آن زیات چناتے پولیو آن بچفنگ نا پڑی کنفنگ نا سجفنگانے‘ دا مہم ناوخت آ 11 ہزار539نا کچ ٹیم بشخ ہلیرہ‘ ہرافتے ٹی 9 ہزار351 موبائل ٹیم،978 فکسڈسائٹ و614ٹرانزٹ پوائنٹ اوار ءُ‘ پولیو ءِ چٹفنگ نا جنگ اٹ باوہ لمہ‘ سیاسی تپہ‘ عالم دین و انتظامیہ نا بھلو کڑدار اسے‘ اوفتا مثبت سوچ، رویہ و کمک اٹ پولیو نا مہم ءِ سرسہب کننگ کینہ‘اوپارے کہ اسلامی دنیا تون اوار مچ آدنیا ٹی ہندا ویکسین نا کمک اٹ پولیو نا چٹفنگ ءِ پک کننگانے‘ ہندا سوب آن چناتے ہر مہم اٹ پڑی کنفنگ اٹ ہچ ءُ ویل اس اف‘ بلکہ داڑان پولیو نا برخلاف قوت مدافعت ودی مریک‘ 27جنوری 2021ء آن دا وخت اسکان صوبہ ٹی اسہ کیس اس ہم رپورٹ متنے ہرا اسہ سرسہبی Achievement اسے‘ مون نا کیس جنوری 2021 ٹی ضلع قلعہ عبداللہ ٹی رپورٹ مسوسس و اپریل 2021 آن (environmental sample) اٹ پولیو وائرس خننگ تنے۔ بلوچستان تدوک آ اِراسال آن پولیو فری صوبہ ءِ‘ پولیو مہم بھاز اہم ءِ‘ نن عزم کرینن کہ ہم وخت اسکان آرام اٹ تولپنہ تانکہ مچ آصوبہ غان پولیو ءِ چٹفپن و پولیو ءِ چٹفنگ کن پولیو تور نا ہرمہم اٹ پانچ سال اسکان نا چناتے پولیو آن بچفنگ نا پڑی کنفنگ المی ءِ و داڑتون اوار چناتے رکھی ٹیکہ غاتا کورس ءِ پورو کرفنگ ہم المی ءِ۔
(آن لائن)