ایوان بالا، اپوزیشن نا 4 ترمیم تون اوار سیکورٹی کونسل و دہشتگردی تور بل آک منظور

 اسلا م آباد(آن لائن/اے پی پی )سینیٹ و قومی اسمبلی اپوزیشن نا ترمیم آتے اوار کننگ آن پد اقوام متحدہ سیکیورٹی کونسل و انسداد دہشت گردی ترمیمی بل آتا منظوری ءِ تِس، جمعیت علمائے اسلام نا کنڈآن بل نا مخالفت ءِ کننگا۔ انسداد دہشت گردی و اقوام متحدہ سیکیورٹی کونسل ترمیمی بل آتیٹی اپوزیشن نا چار ترمیم اوار کننگا و سینیٹ نا کنڈآن منظوری آن پد قومی اسمبلی ہم ترمیم مروک آ بل آتا منظوری ءِ تس۔ ایوان بالا دہشت گردی تور (ترمیمی) بل 2020ءو اقوام متحدہ (سیکورٹی کونسل) (ترمیمی) بل 2020ءانا منظوری ءِ تس۔ پنچ شنبے نادے آ ایوان بالا نا دیوان اٹی وزیراعظم نا سلاہکار پارلیمانی امور ڈاکٹر بابر اعوان وزیر داخلہ نا کنڈآن تحریک پیش کرے کہ دہشت گردی تور ایکٹ 1997ءاٹی پین ترمیم کننگ نا بل دہشت گردی تور (ترمیمی) بل 2020ءءِ قائمہ کمیٹی نا رپورٹ کروک حالیت آتیا دمدستی سجفنگے۔ ایوان تحریک نا منظوری ءِ تس اوکان پد او دا بل ءِ ایوان اٹ پیش کرے۔ چیئرمین شق وار منظوری کن بل ایوان اٹ پیش کرے ہرانا ایوان گیشتری سلاہ اٹ منظوری ءِ تس۔ پارلیمانی باندات سلاہکار ڈاکٹر بابر اعوان وزیر خارجہ نا کنڈآن تحریک پیش کرے کہ اقوام متحدہ (سیکورٹی کونسل) ایکٹ 1948 اٹی پین ترمیم کننگ نا بل اقوام متحدہ (سیکورٹی کونسل)(ترمیمی) بل 2020ءقائمہ کمیٹی نا رپورٹ کروک حالیت آتیا دمدستی سجفنگے۔ ایوان تحریک نا منظوری ءِ تس اوکان پد او دابل ءِ ایوان اٹ پیش کرے۔ چیئرمین شق وار منظوری کن بل ایوان اٹ پیش کرے ہرانا ایوان گیشتری سلاہ اٹ منظوری ءِ تس۔ بنجائی وزیر کانود و انصاف بیرسٹر فروغ نسیم پارے کہ سینیٹ آن ایف اے ٹی ایف نا تعلقدار اِرا اہم بل منظور مسنے ہراڑا ای مچ آ قوم ءِ مبارکبادی ایتوہ، داکانود جوڑ کننگ آن ننے ایف اے ٹی ایف نا ڈیڈلائن آ پورو سلنگ اٹ کمک رسینگک۔ پنچ شنبے نادے آ ویڈیو کلہو اٹی وزیر کانود بیرسٹر فروغ نسیم پارے کہ دا اِرا اہم بل آتیٹی اسہ اقوام متحدہ سیکورٹی کونسل ایکٹ 1948ئ ترمیمی بل و ارٹ میکو دہشت گردی تون تعلقدار یو آرایس نا بل منظور مس۔ داکانود جوڑ کننگ نا کمک اٹ ننے ایف اے ٹی ایف نا ڈیڈلائن آ پورو سلنگ اٹ کمک رسینگک، ای مچ آ قوم ءِ بھلاعئید انا مبارکباد پیش کیوہ و خواست کیوہ کہ دا عئید ءِ راجی فاصلہ نا اصول آتا رداٹ کیر۔