تعلیمی ادارہ غاتا ملنگ آن پد پنجگور کیمپس اٹی ہم سرجز آک بنا کیرہ، ڈاکٹر گل حسن

کوئٹہ (اے پی پی) یونیورسٹی آف تربت پنجگور کیمپس نا کیمپس کوارڈینیٹر و ڈین فیکلٹی آف لیگل ایجوکیشن پروفیسر ڈاکٹر گل حسن پارینے کہ بنجائی حکومت نا کنڈآن تعلیمی ادارہ غاتے دُوارہ ملنگ نا پرمان مننگ آن پد پنجگور کیمپس اٹ ہم خوانفنگ نا عمل نا بناءِ کننگک۔ داخیال آتا درشانی ءِ او پنجگور کیمپس اٹی اڈہلوک آ اسہ دیوان اسے نا کماشی ءِ کرسا کرے۔ داوخت آ پنجگور کیمپس نا فیکلٹی باسک آک و انتظامی آفیسر آتیان بیدس تربت یونیورسٹی مین کیمپس نا چیئرمین شعبہ کمپیوٹرسائنس مختار حسین و ڈپٹی رجسٹرار گنگزار بلوچ اسک ہم ساڑی ئسر۔ سرجم حوال آتا رداٹ کیمپس کوارڈینیٹر پروفیسر ڈاکٹر گل حسن دیوان آن تران کرسا پارے کہ کیمپس اٹی تعلیمی سرجزآتیٹی کروناوائرس آن بچنگ کن رکھی گام گیج آتیا عمل کننگک۔ دیوان اٹی کیمپس اٹ خوانفنگ نا عمل نا بناءِ کننگ نا رد اٹ بست و بند آتے پک دروشم تننگ کن کیمپس نا آفیسر و ایلو اسٹاف ءِ زمواری تننگا۔ داچرجوئی ٹی ڈاکٹر افتخار بلوچ ءِ شعبہ باٹنی نا چیئرمین نا زمواری، شہباز احمد ءِ شعبہ انگلش نا انچارج، نازیہ اسلم ءِ شعبہ ایجوکیشن و سعید عارف ءِ شعبہ کمپیو ٹرسائنس نا زمواری تننگا۔ داوخت آ پنجگور کیمپس نا آفیسر آک کیمپس اٹی خوانفنگ نا عمل نا بناءِ کرفنگ و ایلو تعلیمی و انتظامی سرجزآتیکن کیمپس نا گرج آتا بابت کیمپس کوارڈینیٹر ءِ معلومدار کریر۔ کیمپس کوارڈینیٹر پارے کہ تربت یونیورسٹی نا وائس چانسلر پروفیسر ڈاکٹر عبدالرزاق صابر غٹ کیمپس آتیٹی آن لائن و آن کیمپس کلاس آتا بناءِ کرفنگ نا بابت غٹ آسراتی تا فراوانی و بست وبند آتے پورو کننگ نا پرمان کرینے ہرافتیا ترندی اتون عمل درآمد برجاءِ۔ داکان بیدس پروفیسر ڈاکٹر گل حسن تربت یونیورسٹی نا ڈل اتون اوار کیمپس اٹی برجا شونداری کاریم، بست وبند و ایلو خوانفنگ و انتظامی باندات آتا جاچ ءِ ہلک۔