امریکہ نا کنڈآن پاکستان ءِ 100 پین وینٹی لیٹر تننگا

اسلام آباد (اے پی پی) امریکہ نا کنڈآن پاکستان ءِ پین اسہ سد وینٹی لیٹر تننگا۔ پاکستان اٹ امریکہ نا سفیر پال ڈبلیو جونز وینٹی لیٹر آتا ارٹ میکو کھیپ ءِ چیئرمین این ڈی ایم اے لیفٹیننٹ جنرل محمد افضل نا دوٹی تس۔ پنچ شنبے نادے آ وینٹی لیٹر آتا تننگ نا دود انا وخت آ گپ وتران کرسا چیئرمین این ڈی ایم اے لیفٹیننٹ جنرل محمد افضل پارے کہ ننا داڑے ساڑی گری اواری اٹ کاریم کننگ نا جوزہ نا ڈیک ءِ تننگ ءِ۔ اوپارے کہ حکومت ءِ کوروناوائرس نا دین انا گڑتی تیان پورو وڑاٹ سما ءِ۔ وزیراعظم عمران خان نا کماشی ٹی حکومت ءِ ملک اٹ کورونانا دین ءِ کنٹرول کننگ اٹ سرسہبی دوئی مسنے۔ اوپارے کہ جان جوڑی نا نظام ءِ گچین کرینن، حکومت نا عزم انا سوب آن ٹیسٹنگ نا لائخی ءِ اسہ لکھ ہڑدے آ درینن، ہسپتال و قرنطینہ سینٹر آتا لائخی ءِ ہم ودفینن۔ چیئرمین این ڈی ایم اے پارے کہ دا امریکی حکومت نا کمک اٹ ملوک آ وینٹی لیٹر آتا ارٹ میکو کھیپ ءِ۔ داڑآن پاکستان نا لائخی ٹی پین ودکی مریک۔ امریکی حکومت ڈاکٹر و پیرامیڈیکل اسٹاف ءِ ہم تربیت تننگ ءِ۔ اوپارے کہ نن حکومت پاکستان و این ڈی ایم اے نا کنڈآن سنگتی نا علامت ءِ ہلسا منت واری ءِ ہرفنہ۔ داوخت آ امریکی سفیر تینا تران اٹی پارے کہ صدر ٹرمپ و وزیراعظم عمران خان اواری اٹ کورونانا دین انا مقابلہ ءِ کننگ نا عزم کرینو۔ اوپارے کہ دا وینٹی لیٹر آتا ارٹ میکو کھیپ ءِ، اولیکو کھیپ کراچی ٹی تننگاسس ہرافتے ہسپتال آتیا ہم گدریفنگانے۔ ہنداوینٹی لیٹر آک نمونیہ و ساہ انا ناجوڑی ٹی ہم کمک کیرہ۔ اوپارے کہ داپاکستان و امریکہ نا شریداری نا اسہ مثال اسے۔ پاکستانی میڈیکل اسٹاف ءِ دافتا کاریم اٹ اتنگ نا تربیت ہم تننگک۔ نن صوبائی ایمرجنسی آپریشن سینٹر ءِ ہم پوسکن کننگ اُن۔ امریکی سفیر پارے کہ ننے پاکستان تون شریداری آ گمر ءِ، نن اواری اٹ دا دین ءِ شکست ایتنہ۔