ایس بی کے وومن یونیورسٹی نا آسراتی تے پک کننگ نا گرج ءِ، نذر بلوچ

کوئٹہ: صوبائی محتسب بلوچستان نذر محمد بلوچ ایڈوکیٹ پارینے کہ سردار بہادر خان وومن یونیورسٹی مچ آ صوبہ نا اسٹ انگا وومن یونیورسٹی ءِ ہراڑے صوبہ نا مر انگا علاقہ غاتیان طالبعلم آک بریسہ تعلیم دوئی کننگ اٹی ءُ۔ وخت اس کہ ننے تینا کل چناتے یونیورسٹی اٹ پر سکون ءُ چاگڑد اسے ٹی ہمو کل ءِ تعلیمی آسراتی تے فراوانی کروئی ءِ ہراڑان او دا تعلیمی ادارہ غان فارغ مرسا ملک و قوم نا شونداری ٹی تینا اہم ءُ کڑد ادا کیر۔ دا خیال آتا درشانی ءِ او تدوک آ دے سردار بہادر خان وومن یونیورسٹی نا دورہ نا وخت آ یونیورسٹی انتظامیہ، استاد و طالبعلم آتون ہیت و گپ کرسا کرے۔ او وخت آ اوڑتون اوار سیکرٹری محتسب بلوچستان محمد ہاشم ندیم، ڈائریکٹر محتسب سعید احمد شاہوانی، ڈپٹی ڈائریکٹر عبدالجمیل خان، پروٹوکول آفیسر آفتاب احمد آن بیدس بنجائی محتسب نا ریجنل ڈائریکٹر غلام سرور براہوئی و ایلوفک ساڑی ئسر۔ صوبائی محتسب وومن یونیورسٹی نا اہمیت و افادیت نا بارواٹ ہیت وگپ کرسا پارینے کہ بلوچستان نا قبائلی راج اٹ ہراڑے ننا چناتے تعلیم دوئی کننگ کن اُرا تیان پیش تمنگ اخس سخت ءُ کاریم اسے او ہندن وومن یونیورسٹی نا جوڑی ننا راج و اُلس کن اسہ نعمت اسے آن کم اف۔ او پارینے کہ وومن یونیورسٹی ٹی ہزار آتا کچ اٹ طالبعلم آک تعلیم دوئی کننگ کن بننگ و اوفتا لمہ باوہ و ایلو اُلس ءِ دا ادارہ غا اعتماد نا نشانی ءِ۔ وخت اس کہ یونیورسٹی تون گنڈوک انتظامیہ، استاد و ایلو اُلس تینا لائخی تے نیک نیتی و زمہ داری آن پورو کیرہ۔

(خ ن)