بلوچستان نا وسیلہ غاتیا پین کس ءِ عیاشی کن الیپنہ، قدوس بزنجو

کوئٹہ : وزیراعلیٰ بلوچستان میر عبدالقدوس بزنجو نا کماشی ٹی اڈہلوک صوبائی کابینہ نا دیوان ءِ سوئی گیس لیز معاہدہ ءِ ودفنگ نا بابت بریفنگ تننگا‘ صوبائی کابینہ پی پی ایل نا رویہ غا گڑتی درشانی کرسا پارے کہ نئے بلوچستان ءِ پورو گیس فراوان کننگ انگ ءِ و نئے پی پی ایل آ ارب آ روپئی تا وام تے پدی تننگ انگ ءِ۔ صوبائی کا بینہ پی پی ایل آن وام تے ہلنگ کن آئین وکانود نا وڑ اٹ کل وڑ تے کاریم اٹ اتنگ نا فیصلہ کننگا۔ کابینہ صوبائی وزیر سید احسان شاہ‘ زمرک خان اچکزئی‘ صوبائی سلاہکار نوابزادہ گہرام خان بگٹی و پارلیمانی سیکریٹری توانائی میر عمر خان جمالی آ ساڑی کمیٹی ٹہیفنگ نا فیصلہ کرے‘ کمیٹی وزیراعظم و پی پی ایل کمامدار آتتون اوڑدہی کیک‘ کابینہ فیصلہ کرے کہ پین ہننگ نا جاگہ غا پی پی ایل ءِ پک کروک وام تے تننگ کن ٹائم فریم تننگک و پن کروک وخت اٹ وام تے تفننگ آ آئینی وکانودی کسر تینائی کننگک۔ وزیراعلیٰ دا وخت آ تینا خیال آتا درشانی ءِ کرسا پارے کہ پی پی ایل نا رویہ سگ آن پیشن ءِ‘ آئین وکانود نا رد اٹ تینا حق آتے ہر حال اٹ ہلینہ‘ او پارے کہ مے افن‘ تینا وسیلہ غاتیا مچ آن مچ ننا حق ءِ‘دا کمپنیک 75 سال آن بلوچستان نا استحصال ءِ کننگ اٹی ءُ و نن بلوچستان نا وسیلہ غاتیا کس ءِ عیش کننگ کن الیپنہ۔ اوپارے کہ قدرتی گیس بلوچستان نا کٹیا ناکل آن بھلا وڑ ءِ نن گیس ءِ بند کننگ نا واکداری آن پد ہم دا دنگ اسکان ہننگ خواپنہ‘ آئین پاہک کہ ہرا صوبہ نا قدرتی وسیلہ غاک مریرہ اوفتیا اولیکو حق ہمو صوبہ نا مریک۔ 1954 آن گیس انا پیداوار نا بنا مننگ آن دا وخت اسکان ننے ننا حق تننگ تنے‘ او پارے کہ یخ اٹ گیس اف فصل آتا سیزن و باسنی ٹی بجلی رسینگپک مگہ بلوچستان بنجا نا اکائی اس اف۔ پی پی ایل آ 30 ارب روپئی ناپک کروک وام ارے‘ ہراٹی ڈکوک ءُ گڑاس اف۔ وزیرعلیٰ پارے کہ نن بین الصوبائی ہم آہنگی ایلمی آ باور کینہ اگہ ننے ننا حق تننگتو تو دا وڑ انا ایلمی نا انت فائدہ و اگہ ننا موقف ءِ سنجیدہ ہلنگتو تو ولدا نن آئین نا وڑ اٹ گام ہرفنہ۔ وزیراعلیٰ پڑو کرساپارے کہ بلوچستان تون ماتنی آ سلوک ءِ بند کننگے و پی پی ایل آ ہرا وامک ءُ اوفتے دمدستی تننگے۔ وزیراعلیٰ بلوچستان میر عبدالقدوس بزنجو ناکماشی ٹی صوبائی کابینہ نا دیوان اڈہلک‘ کابینہ دیوان 63 ٹکی ایجنڈا غا تالان ئس‘ کابینہ اہم انگا نوعیت انگا نوعیت نا گیشتری اہم فیصلہ غاتا منظوری تس‘ کابینہ پشین گنج خاخر نا زہمی تے معاوضہ تننگ نا منظوری ءِ تس۔ کابینہ قومی نصاب نا فیز 1گریڈVi – VIII آ عملدرآمد نا بابت کمیٹی ٹہیفنگ نافیصلہ کرے‘ کابینہ مسٹمیکو اولسرجاچ کوئٹہ سیف سٹی پروجیکٹ نا منظوری ءِ تس‘ کابینہ پرمان کرے کہ کوئٹہ سیف سٹی پراجیکٹ ءِ اِرا تُو اٹ پورو کننگے‘ کابینہ حکومت بلوچستان نا اولسر جاچ اشتہار پالیسی 2023 نا منظوری ءِ تس‘ سیکرٹری حوالکاری حمزہ شفقات ایجنڈا ءِ پیش کرے‘اولسرجاچ پالیسی ٹی 2013 نا اشتہار پالیسی ٹی منہ ترمیم کننگانے پالیسی نا رد اٹ اشتہار تے اخبار تتون اوار ٹی وی و ڈیجیٹل میڈیا ءِ ہم جاری کننگ مریرہ۔ کابینہ بڑزکو تکنیکی تعلیم ءِ المی سروس گوندنگ نا منظوری ءِ تس۔

(خ ن)