وزیر اعظم نا ملکی حالیت آتیا سلاہ سوج کن دیوان بٹنگ نا فیصلہ

اسلام آباد : وزیراعظم ملکی سیاسی و آئینی امور تیا سلاہ سوج کن دیوان بٹنگ نا فیصلہ کرینے۔ وزیراعظم شہباز شریف اینو ہفتہ نا دے سیوتی راہشون تا دیوان ءِ بٹنگ نا فیصلہ کرینے‘ دیوان اٹ ملک انا جم حالیت آتا جاچ ءِ ہلنگک۔ سیوتی راہشونک ساڑی آئینی تنکی آن پیش تمنگ نا سلاہ ایترہ‘ کانودی ٹیم ہم سیوتی راہشون تے سپریم کورٹ نا باندات آ بریفنگ ایتک‘ حوالی نا رد اٹ عدالتی فیصلہ غاتا رد اٹ حکومت آئینی آپشن تیا سجفک۔ سپریم کورٹ نا چیف جسٹس نا کڑدار نا ہم جاچ ءِ ہلنگک‘ سیوتی حکومت سپریم کورٹ آن فل کورٹ نا ٹہیفنگ کن دوارہ خواست کیک‘ بنجائی حکومت امنائی اٹ آخبت نا حکومت عملی ءِ پک کیک۔ داکان بیدس وزیراعظم شہبازشریف پارینے کہ پاکستان اٹ درملکی زرکار آتے ہر وڑ انا کمک فراوان کننگک۔ پاکستان متحدہ عرب امارات تون واپاری و زرکاری تون اوار چندی بشخ آتے ٹی ایلمی تعلقداری تے پین سوگو کننگ ءِ بھاز اہمیت ایتک۔ وزیراعظم تون متحدہ عرب امارات نا زرکاری کمپنی نا ڈل اوڑدہی کرینے ڈل انا کماشی ءِ حیات بائیو ٹیک نا چیئرمین و متحدہ عرب امارات نا حکمران خاہوت نا باسک شیخ احمد دلموک المکتوم کرے‘ دیوان اٹ بنجائی وزیر خزانہ محمد اسحاق ڈار، وزیر برائے نیشنل ہیلتھ سروسز عبدالقادر پٹیل، ایس اے پی ایم طارق فاطمی وتعلقدار سرکاری محکمہ غاتا بڑزکو کمامدار آک ہم ساڑی ئسر۔ وزیراعظم پارے کہ پاکستان و متحدہ عرب امارات نا نیام اٹ ایلمی آ تعلقداری تا ماس تاریخ اٹ بھاز سوگو ءِ۔ پاکستان متحدہ عرب امارات تون واپاری و زرکاری تون اوار چندی بشخ آتے ٹی ایلمی تعلقداری تے پین سوگو کننگ ءِ بھاز اہمیت ایتک۔ پاکستان اٹ درملکی زرکار آتے ہر وڑ انا کمک فراوان کننگک‘ وزیراعظم حیات بائیو ٹیک نا کنڈآن ویکسین تیار کننگ اٹ زرکاری کننگ نا استخواہی تا ستاءِ کرے۔ وزیراعظم ڈل ءِ قابل تجدید توانائی نا بشخ اٹ زرکاری کننگ نا سلہ ہم خلک۔ شیخ احمد دلموک المکتوم پارے کہ کنے پاکستان اٹ زرکاری نا وارخواہی تا سماءِ و متحدہ عرب امارات توانائی وجانجوڑی نا بشخ آتے ٹی تینا گام تے ودفنگ کن ہروک ءِ۔ شیخ احمد دلموک المکتوم پاکستان اٹ متحدہ عرب امارات نا زرکاری نا پورٹ فولیو ءِ پین تالان کننگ نا استخواہی تا درشانی ءِ کرے۔

(آن لائن)