انشورنس پالیسی ہولڈر نا جنوزان ڈیتھ انشورنس کلیم نا حقدار گوندنگا

اسلام آباد: صدر مملکت ڈاکٹر عارف علوی انشورنس کمپنی ءِ متوفی پالیسی ہولڈر نا جنوزان ءِ ڈیتھ انشورنس کلیم ادا کننگ نا پارت کرے۔ انشورنس کمپنی متوفی اَرے نا کنڈآن رزاک اٹ ناجوڑی ءِ ڈکھنگ نا عذر آ جنوزان ءِ انشورنس کلیم تننگ آن نمن مسوس، ایوان صدر نا پریس ونگ انا رداٹ صدر مملکت دا فیصلہ ءِ غاوتروک شہناز اختر نا کنڈآن بنجائی انشورنس محتسب نا فیصلہ نا برخلاف دائر کروک اپیل ءِ قبول کرسا تس ہرانا رداٹ دا کیس ءِ دا بنداو آ بند کرسا سرتننگاسس کہ جنوزان ءِ اونا ایماندار اَرے نا اکاؤنٹ آن یک و نیم لکھ روپئی نا کٹوتی کروک آ پریمیم نا زرءِ پدی تننگانے و چونکہ باندات ہمدردی نا بنداو آ طے مسوسس، ہندا وڑ، کمپنی مرک انا بیمہ نا دعویٰ نا ادائیگی نا زموار متو۔ بنجائی انشورنس محتسب نا فیصلہ نا برخلاف غاو کروک صدر مملکت تون اسہ درخواست اس دائر کرے، ہرادے او قبول کرے۔ تینا فیصلہ ٹی، صدر گونداکہ انشورنس کمپنی مرک انا سرٹیفکیٹ نا بنداو آ دا دعویٰ ءِ مسترد کرے کہ ہراڑان دا پاش مریک کہ متوفی مرک آن اسہ سال اس مست آن شوگر و جغر نا ناجوڑی ٹی اختہ ئسک ولے سرٹیفکیٹ اٹی داوڑنا ہچ ءُ مداسے نا پاننگتویسس۔ اومستی پارے کہ انشورنس کمپنی لاہور نا اسہ ہسپتال اسے نا کنڈآن 2017 ٹی جاری کروک ایڈمیشن چارٹ آ سیبو کریکہ وخت اس کہ پالیسی سال 2015 ٹی جاری کننگاسس، ہندا وڑ دا انشورنس نا مد انا بابت الوکہ۔ اوسال 2009 ٹی لاہور ہائی کورٹ نا اسہ فیصلہ اسے نا ہم حوالہ ءِ تس، ہراٹی پاننگاسس کہ ہائی بلڈ پریشر، شوگر کون آ ناجوڑی تیٹی اختہ بندغ آتا گیشتری تینا زند اٹی محتاط مرسا دہائی تسکان زندہ سلرہ و داوڑنا ناجوڑی تے ڈکھنگ ءِ درو اٹ تعبیر کننگ مفک۔ صدر پارے کہ انشورنس کمپنی تون داوڑنا ہیبدار بنداو تیا انشورنس کلیم ءِ مسترد کننگ نا جواز اف۔ صدر مملکت تینا پرمان اٹی گوندا کہ انشورنس کمپنی نا کنڈآن بدانتظامی مس، ہنداسوب آن بنجائی انشورنس محتسب نا فیصلہ ءِ مسترد کننگک۔ صدر انشورنس کمپنی ءِ پین پارت کرے کہ او صدر نا پرمان نا وصولی نا 30 دے انا تہہ ٹی غاو کروک ءِ انشورنس کلیم ءِ ادا کے۔

(اے پی پی)