سینیٹ نا سوشل میڈیا غا توہین آمیز مواد نا ودوک آ رجحان آ گڑتی

اسلام آباد: چیئرمین سینیٹ محمد صادق سنجرانی سوشل میڈیا پلیٹ فارم آ تیا ادارہ غاتا برخلاف ہرزہ سرائی نا باندات ءِ تعلقدار قائمہ کمیٹی آ راہی کرے، وخت اس کہ وزیر مملکت کانود و انصاف ایوان ءِ پارینے کہ نیشنل سوشل میڈیا ورکنگ بل آ کمیٹی اس جوڑ کننگانے ہرا دا بابت تینا سلاہ تے ایتک داوخت آ سوشل میڈیا نا پاکستان اٹی رجسٹریشن مفننگ نا سوب آن اوفتا برخلاف کارروائی کننگ مفک۔ جمعہ نادے آ سینیٹ اٹی سوج ورندی تا وخت آ سینیٹر بہرہ مند تنگی نا سوج انا ورندی ٹی وزیر مملکت کانود و انصاف سینیٹر شہادت اعوان پارے کہ گیشتری سوشل میڈیا پلیٹ فارم آک پاکستان اٹی رجسٹرڈ افس، پاکستان اٹی رجسٹرڈ مفروک آ پلیٹ فارم آتا برخلاف پاکستان اٹی کارروائی ہراوڑ مننگ کیک، فیس بک و ٹویٹر ننتون رجسٹرڈ افس داڑکن نن کانود سازی کننگ نا کوشست کرینن داڑکن نیشنل سوشل میڈیا ورکنگ کمیٹی بل اس جوڑ کننگ انگ ءِ تانکہ پیشن نا سوشل میڈیا ءِ پاننگ کینہ کہ او پاکستان اٹ تینا رجسٹریشن ءِ کرفر تانکہ ہمو مخلوق ہرا قومی ادارہ غاتا برخلاف مواد سوشل میڈیا غا شاغرہ اوفتا برخلاف کارروائی کننگ کین، 2019 اٹی وکی پیڈیا نا برخلاف لاہور ہائیکورٹ اسہ کیس اسے ٹی اودے بلاک کننگ ناپرمان کریسس۔ پی ٹی اے وکی پیڈیا ءِ نوٹس تس ولے او ورندی تتو، نن 48 گھنٹہ کن اونا سروس ءِ بند کرین۔ ساڑی وزیراعظم اسہ کمیٹی اس جوڑ کرینے ہراٹی کانود سازی کن سلاہ تننگ نا پاننگانے۔ دنیش کمار نا ضمنی سوج انا ورندی ٹی اوپارے کہ مذہب اسے نا برخلاف خار تس مواد آ کارروائی کننگک۔ فیس بک انا 35 ہزار آن زیات اکاؤنٹ آتے ہنداسوب آن بلاک کرے، ٹویٹر آ 5 ہزار آن زیات اکاؤنٹ آتے بلاک کرے، ٹک ٹاک آ 183اکاؤنٹ بلاک کرے، یوٹیوب آ5 ہزار 890 اکاؤنٹ بلا ک کرے۔ سینیٹر روبینہ خالد نا سوج انا ورندی ٹی اوپارے کہ وزیراعظم اگست 2022 اٹی نیشنل سوشل میڈیا ورکنگ بل آ کمیٹی اس جوڑ کرینے ہرا تینا کاریم ءِ کننگ اٹی ءِ ہرا پیکا کانود اٹی کمتی ودکی نا ہم جاچ ءِ ہلیک۔ چیئرمین سینیٹ دا باندات ءِ تعلقدار کمیٹی آ گدریفے۔

(اے پی پی)