جے یو آئی علاقہ والس نا شونداری و شونہالی کن گام گیج کرینے مولانا عبدالواسع

کوئٹہ، جمعیت علماء اسلام بلوچستان نا صوبائی امیر سینیٹر مولانا عبدالواسع توئی باتوزئی ڈیم قلعہ سیف اللہ ٹی بھلو السی مچی سے آن تران کرسا پارے کہ بلوچستان نا در و دیوال و اونا کل علاقہ غاتے ٹی جمعیت علماء اسلام نا السی خذمت و شونداری گام گیج آک اینو ہم پاش وڑ اٹ خننگ انگ ءُ توئی باتوزئی ڈیم قلعہ سیف اللہ نا تقدیر ءِ بدل کروک تاریخی و انقلابی ڈٹ اسے ہرا لکھ آ ایکڑ غیر آباد ڈغار تے آبادی کننگ نا لائخ جوڑ کرسا علاقہ ٹی کشاری انقلاب نا بنداو ءِ تخا و ہزار آ خاہوت آتا زرگزرانی آخبت نا رکھ ءِ کرے‘ اگہ سیاسی بغض، تینا فائدہ وبدبیسئی نا سیاست آن بڑز مرسا السی آسودہی‘ اجتماعی فائدہ و صوبہ نا شونداری ءِ اولیت تننگے تو بلوچستان نا ہر حلقہ ٹی دا وڑ انا الس دوست و آخبتی بھرم تروک ڈٹ آک بنا مننگ کیرہ‘ او پارے کہ قلعہ سیف اللہ نا الس نا وسیلہ غاتا جے یو آئی نا نمائندہ غاک امین مرسا اوفتا امانت نا حق ءِ ادا کرینو، ہندا سوب ءِ کہ اینو بلوچستان نا ہرضلع ٹی دا وڑ انا بے کچ شونداری ڈٹ آک ساڑی ءُ ہرافتیان الس دراست فائدہ ہرفنگ اٹی ءِ‘ جمعیت علماء اسلام نا سرکڑدہ و اونا نمائندہ غاک الس نا منتوار مرسا ایوان اسکان سر مریرہ، دا سوب آن او اسہ بندغ‘ ٹولی یا واکدار نا مون آ آخا بلکہ تینا الس نا مون آ ورندی ایترہ‘ موسمی بندغ‘ سیاسی پیراشوٹرز و مصنوعی نمائندگی نا کمک اٹ اقتدار نا ایوان اسکان سر مروک آک بلوچستان نا اجتماعی فائدہ غاتے بھاز نسخان رسیفینو‘ و صوبہ نا زرگزرانی و شونداری بنداو آتے نزور کریر‘ سینیٹر مولانا عبدالواسع پارے کہ جمعیت علماء اسلام کچ اٹنگا وسیلہ وچنکو وخت اسے ٹی بلوچستان ءِ دا وڑ انا میگا ڈٹ آتیان شُپ کرینے ہراکہ اینو ہم تینا فائدہ و اہمیت نا لحاظ اٹ نمان ءُ، ولے است ہسونی نا ہیت دادے کہ داڈٹ آتیان پد شونداری نا ہمو ریسہ برجا سلتو و کیہی ڈٹ آک اینو ہم ہمو جاگہ غاٹو ہراڑے اوفتے النگاسس۔ نن اینو ہم پیدوار وڑ اٹ پانہ کہ بلوچستان نا گیشتری الس نا حقی نمائندگی نا دعویٰ جمعیت علماء اسلام نا حق ءِ و السی وسیلہ غاتا امانت و دیانت داری اٹ رکھ کروک آ جماعت ہم جے یو آئی ءِ اینو ہم الس نا نزور مفروک پت جمعیت علماء اسلام نا سرکڑدہ و اونا سیاسی جہد تون گنڈوک ءِ او پارے کہ جمعیت علماء اسلام نا حقی السی مینڈیٹ نا مون اٹ غیر مقبول، غیر السی و مصنوعی نمائندہ غاتے بیٹ کرسا بلوچستان نا شونداری نا سفر ءِ توننگا‘ اینو صوبہ ٹی ہرا سیاسی بے باوری فریشانی ودی مسنے اونا سوب دا وڑ انا فیصلہ غاک ءُ۔