چاغی اولیاء کرام تا ڈغار، اسلامی و بلوچی روایت و تاریخی میرات نا ہند ءِ،میر قادر سنجرانی

چاغی، قبائلی راہشون میر قادر سنجرانی تینا اسہ بیان اٹی پارینے کہ ضلع چاغی اولیاء کرام تا ڈغار، اسلامی و بلوچی روایت و تاریخی میرات نا ہند ءِ‘ ہراڑے کساس 42 قوم اسہ اسیجائی ربیدگی وراجی نظام نا رد اٹ آباد ءُ‘ او پارے کہ دا ڈغار مدام امن، رواداری و تین پہ تینی شرف انا بنجا مسنے ہراڑے اسہ قوم اسے نا سردار ناکاٹم آ دستار تفنگ نا مسخت بیرہ رسمی ءُ عمل اس اف بلکہ کل ایلم قوم تا نیام اٹی خیر، خوشی و زمواری نا عملی قول مریک‘ داڑے آباد قبیلہ غاک دتر نا رشتہ غاتتون و اسیجائی فائدہ نا سوب آن اسٹ ایلو تون گنڈوک ءُ‘ مُر ہننگ‘درگزر‘ ورناتے ٹی سگ و بزرگ آتا شرف دا ڈیہہ انا نہادی میرات مسنے‘ قبائلی جھیڑہ، خون وایلو جھیڑہ غاتے مدام اولیتی بنداو تیا جرگہ و روایتی میڑھ و مرکہ نا کمک اٹ ایسر کرسا قبیلہ غاتا نیام اٹ ایلمی نا چاگڑد جوڑ کننگانے‘ او چیف آف چاغی، خان صاحب، قبائلی سردار، سیاسی راہشون، میر و متبر و عالم دین تیان خواست کرے کہ او تینا اسلامی و قبائلی روایت آتے زندہ تخسا محمدحسنی و شے زہی قوم انا نیام اٹ دمدستی نیام تمسا برجا جھیڑہ نا چٹفنگ اٹی تینا کڑد ءِ ادا کیر ہندا وڑ برہانزئی و مندائزئی مینگل قوم و ایلو ایلم قبیلہ غاتا نیام اٹی ہم خیر انا عمل ءِ سوگو کرسا ضلع چاغی نا متکن آ روایت آتے پوسکن ءُ روح اس ترسا تاریخ نوشتہ کننگ اٹی تینا عملی کڑد ءِ ادا کیر۔ (نامہ نگار)