ڈھاڈر نا بنداوی ویل آتا ایسری کن اسیجائی جہد المی ءِ،شہری ایکشن کمیٹی ڈھاڈر

ڈھاڈر، شہری ایکشن کمیٹی ڈھاڈر السی ویل آتا ایسری، بنداوی آسراتی تا فراوانی و شاری حق آتا رکھ اکن سیاسی و مذہبی جماعت، سول سوسائٹی، پوریاگر برادری و ٹریڈ یونین تون اوار کل تپہ غاتتون اوار اسیجا منظم جہد کننگ نا ارادگی نا درشانی ءِ کے دا رد اٹ شہری ایکشن کمیٹی ڈھاڈر نا کنڈآن مفتی علی اصغر مگسی نا کماشی ٹی مگسی ہاؤس ڈھاڈر اٹی اہم ءُ دیوان اس اڈ ہلک ہراٹی شہری ویل، امن و ایمنی‘ بجلی، دیر، جانجوڑی‘ تعلیم و ایلو بنداوی السی مشکل آتیا جم سجفنگا‘ شریدار آتے ٹی منیر احمد رند، میر اسلم جتوئی، صدر پریس کلب ڈھاڈر محمد عارف بنگلزئی، حافظ احمد خان خجک، رند پینل نا عبدالحئی گولہ، پی ٹی آئی نا غلام فاروق جتوئی، پی پی پی نا انفارمیشن سیکرٹری محمد اسلم بوہڑ، ہندو پنچاہت نا مسکوہی صدر سنجے کمار ایس کے، سندیپ وادھا، تحریک لبیک پاکستان نا مولانا عبدالصمد قاسمی، سوشل ورکر ظہور احمد بلوچ ایلوفک اوار ئسر وخت اس کہ بھاز آ سیاسی جماعت تا اہم عہدیدار آک تینا اختہ مننگ ناسوب آن دیوان اٹی بشخ ہلتوس‘ السی ویل آتا بابت شریدار آک تینا خیال آتا درشانی ءِ کریر و بنداوی ویل و اوفتا ایسری کن تینا سلاہ تے پیش کریر‘ دیوان اٹی دا ہیت آ امنا کننگا کہ السی ویل آتا ایسری کن کل سیاسی و مذہبی جماعت، سول سوسائٹی، ٹریڈ یونین‘ پوریا گربرادری و علاقائی متبر آتے اسہ پلیٹ فارم آ اسیجا کرسا اسیجائی جہد ءِ مستی دننگک‘ شریدار آک پاریر کہ ڈھاڈر نا الس ءِ مون تروک متکن آ ویل آتا ایسری کن تعلقدار کمامدار و ادارہ غاتتون حوال کننگک و گرج مننگ آ آئینی و کانودی دنگ اٹ مرسا السی ویل تیکن برانزی تحریک و ریلی ہم اڈتننگک‘ شہری ایکشن کمیٹی نا عہدیدار آک پاریر کہ ڈھاڈر نا السی حق و بنداوی آسراتی تا دوئی کننگ کن تینا جہد ءِ برجا تخنہ و شار و علاقہ نا جم فائدہ کن کل تپہ غاتتون اوار کاریم کننگ نا کوشست کننگک تاکہ علاقائی فائدہ کن اسیجائی جہد ءِ ترند کننگ مرے۔ (نامہ نگار سمیع اللہ جلبانی)