امن ءِ خراب کننگ نا ہر کوشست نا پبی ورندی تننگک،عطا اللہ تارڑ

اسلام آباد، بنجائی وزیر حوالکاری و شینکاری عطا اللہ تارڑ پارینے کہ اوغان عبوری حکومت ءِ عسکریت پسندانہ سوچ آن پیش تمسا زموار ریاست اسے نا سوچ ءِ تینا کروئی مریک، پاکستان امن، مذاکرات و پرامن بقائے تین پہ تینی آ یخین تخک، ولے پاکستان نا امن نا است خواہی ءِ نزور تکنگپ، امن ءِ خراب کننگ نا ہر کوشست نا ورندی ءِ تننگانے و تننگک، اوغان الس اسہ گچین و شونہال آخبت نا حقدار ءُ و اوفتے تینا آخبت نا بارواٹی فیصلہ کننگ نا اختیار بایدے ملے۔ سے شنبے نادے آداڑے اسہ ہندی ہوٹل اسے ٹی ”اوغان حالیت و امن نا کنڈآ پیش رفت” نا سرحال آ اڈ ہلوک دود آن تران کرسا بنجائی وزیر حوالکاری پارے کہ پاکستان و اوغانستان ہمسایہ ملک ءُ و مدام ہمسایہ رہینگرہ، ہڑتوم آ ملک آتا نیام اٹ تاریخی رابطہ و تعلقداری ساڑی ءِ ولے مستین اٹ تعلقداری تیٹی شیف بڑزی مسنے۔ او پارے کہ پاکستان گدرینگوک آ کیہی دہائی تیٹی 40 لکھ آن زیات اوغان باہوٹ آتا میزبانی ءِ کرینے و بھاز است انا بھلنی نا درشانی ءِ کرے، او پارے کہ پاکستان مدام امن نا خواہندار مسنے و پرامن بقائے تین پہ تینی آ باور تخک، دا مسخت کن چندی وخت آتیٹی مذاکرات و ہیت و گپ نا کمک اٹ ویل آتا ایسرآتا کوشست کننگا۔ عطا اللہ تارڑ پارے کہ پاکستان آن بڑزکو کہول انا چندی ڈل آک اوغانستان آہنار تانکہ ویل آتا ایسر اس پٹنگ مرے و ہڑتوم آ ملک آتا نیام اٹ پرامن بقائے تین پہ تینی ءِ پک کننگ مرے وخت اس کہ استنبول و دوحہ تون اوار سنگت ملک آتیٹی ہم مذاکرات مس۔ او پارے کہ امن ءِ دوئی کننگ مریک و پاکستان امن ءِ موقع تننگ کن ہر ممکن کوشست کرے ولے سوج دادے کہ انت امن نا دوئی کننگ نا عزم ساڑی ءِ؟ بدبختی اٹ اوناورندی نفی ٹی ءِ۔ بنجائی وزیر پارے کہ اوغانستان اٹی ساڑی آ ویل آتا اسہ بھلاسوب عسکریت پسندانہ سوچ ءِ، اوغان عبوری حکومت ءِ دا سوچ آن پیش تمسا ریاستی و مدبرانہ فکر انا طرز ءِ اختیار کروئی مریک۔ او پارے کہ اوغانستان اٹی واپارنا مون آ دننگ نا بھلو گمان اس ساڑی ءِ، اگہ امن مرے و نیامی ایشیاء آن اوغانستان نا کسر پاکستان اسکان واپاری راہداری جوڑمرے تو ہڑتوم آ ملک آتا الس شونہال مننگ کیک۔ نیامی ایشیاء نا خشکی ٹی تموک آ ریاست آتیکن باسن انگا دِیر اسکان رسینگ نا خڑک انگا کسر پاکستان ءِ۔ او پارے کہ دا واپاری راہداری نا کسر اٹ بنداوی اڑاند عسکریت پسندی ءِ۔ اوغانستان اٹی دہشت گرد و جہانی کہول آ کالعدم گوندنگوک آ تنظیم تا باسک آتا رکھ جاگہ غاک ساڑی ءُ۔ عطا اللہ تارڑ پارے کہ پاکستان مذاکرات نا کمک اٹ اوغان حکومت آ پیدوار کرینے کہ اودے دا سوچ آن پیش تموئی مریک و اسہ قابل عمل و پائیدار نظام اسے نا کمک اٹ امن قائم کروئی مریک۔ او پارے کہ اوغانستان اسہ ورنا آبادی والا ملک اسے ولے زالبول آتا اسہ بھلو کچ اسے افرادی قوت نا بشخ مننگ آن محروم تخنگانے ہراڑآن ملک انا زرگزرانی شونداری زہمی مننگ ءِ، راج انا گڑاس تپہ غاتے بنداوی حق آتیان محروم تخنگ انگ ءِ۔ او پارے کہ پرامن بقائے تین پہ تینی کن ”جیو و جینے دو” نا اصول ءِ امنا کروئی مریک۔ او پارے کہ پاکستان نا کنڈآن پدریسہ مذاکرات و ہیت و گپ نا چرجوئی برجاءِ، نن تینا موقف ءِ پاش کرینن کہ شونہالی نا کسر بیرہ امن آن مرسا گدرینگک۔ اگہ دا تصور ءِ اونااصل روح اتون سمجھنگے تو اوغان الس و اوغان عبوری حکومت نا نیام اٹ مروک آ خلیج ءِ ہم مر کننگ مریک۔