آئی پی ایل نا سرسہب آ گواز گر سریش رائنا لیگ ءِ الا

دبئی (مانیٹرنگ ڈیسک) دبئی ٹی 19 ستمبر آن شیڈول آئی پی ایل ءِ کورونا وائرس تینا پلویڑ اٹی ہلکنے۔ درملکی گوازی گر تا آئی پی ایل اٹ بشخ ہلنگ آ سوج ہرفنگ انگ ءِ، کورونا کیس آتا پازیٹو مننگ نا کچ 11 اسکان سر مسنے، ٹیم اتون ساڑی چنائی سپرکنگز نا پنی آ بیسٹمین سریش رائنا فیملی ویل آتا سوب آن لیگ آن پیش تمانے۔ چنائی سپرکنگز نا کمامدار آک دا ہیت ءِ پک کرینو کہ سریش رائنا آئی پی ایل آن پیش تمانے۔ اونا ساڑی مفننگ آن ٹیم ءِ بھلو نسخان اس رسینگانے۔ ننا دا سخت انگا وخت اٹ سریش رائنا او اونا خاہوت تون اوار اُں، ایم ایس دھونی تون اوار انٹرنیشنل کرکٹ آن ریٹائرمنٹ ہلوک آ رائنا چنائی سپرکنگز نا ٹاپ اسکور ءِ۔ میڈیا رپورٹ آتا رداٹ اسہ دے اس مُست چنائی سپرکنگز ٹیم انا اسہ فاسٹ بولر دیپک چاہر نا کورونا ٹیسٹ پازیٹو بسوسُس اوکان پد 34 سال نا سریش رائنا پدی بھارت آ ہننگ نا فیصلہ کرے۔ او انڈین پرمیئر لیگ نا تاریخ نا ارٹمیکو سرسہب انگا گوازی گر ءِ۔ ہرا دا وخت اسکان 193 میچ آتیٹی 33.34 نا اوسط اٹ 5368 رنز اسکور کرینے ہراٹی اسہ سنچری او 38 ففٹی اوار ءُُ۔ او دا رنز آتے 137.11 نا سٹرائیک ریٹ اٹ سکور کرے، دا وخت اسکان رپورٹ آتیٹی یانزدہ کورونا پازیٹو کیس آتیٹی کل آن زیات گوازی گر و اسٹاف نا تعلقداری چنائی سپرکنگز آن ءِ۔