پاکستان فٹ بال فیڈریشن نا کنڈآن کوچنگ کورس آک 6 ستمبر آن بنا مریرہ

لاہور (مانیٹرنگ ڈیسک) پاکستان فٹ بال فیڈریشن نا کنڈآن پنچ سال آن پد پی ایف ایف ‘سی’ لائسنس کوچنگ کورس آتا اڈ تننگ 6 ستمبر آن کراچی و لاہور اٹ کننگرہ۔ دا کورس آتیٹی ہڑتوم آ شار تیان 25، 25 اومیت دار بشخ ہلیرہ او کورس آتیٹی اوار مننگ فرسٹ کم فرسٹ سرو نا بنداو آ مریک۔ ہڑتوم آ کورس آتا کم از کم 50 درسد نشست نیاڑی اومیت دار آتے تننگک۔ نشست آتا پُر مفنگ نا حالیت اٹ ویٹنگ لسٹ اٹ اوار اومیت دار آتے وارخواہی تننگک، کورس آتیٹی تھیوری نا بشخ 6 آن 13 ستمبر اسکان زوم آن لائن ایپ نا کمک اٹ خوانفنگرہ۔ وخت اس کہ کورس آتا پریکٹیکل سیشن لاہور اٹ 17 آن 20 ستمبر نا نیام اٹ او کراچی ٹی 24 آن 27 ستمبر نا نیام اٹ اڈ تننگرہ۔ پی ایف ایف نیشنل ٹیکنیکل ڈائریکٹر ڈینیل لیمونیس پارینے کہ کوچ آتا تعلیم نا آب ءِ جوان کننگ کن آن کورس آتے اڈ تننگ بھاز اہم ءِ۔ او پارینے کہ کورس آتا اومیت دار آتے سہی وخت اٹ سہی کچ اٹ صحیح معلومداری تیان پہہ کننگک۔ پی ایف ایف جنرل سیکرٹری منیزے زینلی پارینے کہ پنچ سال آن پد دا کورس آتا اڈ تننگ پاکستان اٹ فٹ بال نا شونداری نا کنڈ آ اسہ بھاز بھلو گام اسے۔ او پارینے کہ ملک اٹ کوچ آتا کچ ءِ ودفنگ فٹبال نا جوانی کن بنداوی گرج ءِ۔