اپوزیشن نا خواست ءِ منان تو پرسجوئی عمل بے کار مریک، شاہ محمود قریشی

اسلام آباد (آن لائن) وزیر خارجہ شاہ محمود قریشی، وزیر اعظم نا سلاہکار داخلہ و احتساب شہزاد اکبر و پارلیمانی سیکرٹری ملیکہ بخاری پارینے کہ بنجائی اسمبلی ٹی اینو اِرا بھاز اہم ءُ بل ووٹنگ آن ہد منظور مسر دا ہمو کانود سازی ءِ ہرا ننے گرے لسٹ آن کشسا وائٹ اٹ اتنگ کن درکار ءِ، ہندوستان پاکستان ءِ بلیک لسٹ اٹ خسنگ خواہک، خدانہ خواستہ بلیک لسٹ مسن تو زرگزرانی پابندی و واپاری زہمی مننگ کیک۔ پاکستان ءِ ایف اے ٹی ایف نا گرے لسٹ آن کشنگ کن دا کانود آتیٹی ترمیم المی ءِ۔ اپوزیشن پاہک ایف اے ٹی ایف نا بابت کانود پاس کروئی ءِ تو نیب کانود آ ہم ہیت کننگے نن ہیت کننگ کن تیار اُن ولے اپوزیشن ہڑتوم آ گڑاتا اسہ ایلو تون لنک ءِ کپ، اپوزیشن ءِ حکومت مسودہ پیش کرے اپوزیشن تینا نیب مسودہ ٹی 34 ترمیم سجفنگا، اپوزیشن نا ترمیم نیب کانود آ فاتحہ خواننگ نا ہیت ءِ، نن اکراس دی بورڈ احتساب خوانہ کس اسے رعایت تننگ ننا مسخت اف، گجر کنگوٹہ تو پِڈ اٹ کنا خل/تسکہ، داڑان بے غم اُن انتئے کہ نن گجر کنتنن۔ تدوک آ دے اوار کروک آ پریس کانفرنس آن تران اٹی وزیر خارجہ شاہ محمود قریشی پارینے کہ خواجہ آصف کنا تران کن رنگ سازی نا لوز کاریم اٹ ایس، اپوزیشن ایف اے ٹی ایف نا پن آ رنگ آتے ٹی بھنگ شاغنگ نا کوشست کننگ اٹی ءِ، ای قومی اسمبلی ٹی قوالی آخا وخت اس کہ پکا راگ اس بنفیٹ، پاکستان ءِ وڈی خوری نا ناسور آن پاک کننگ پکا ءُ راگ اسے۔ پاکستان نا مفاد ءِ مون آ تخوئی تمک، نن بلیک میل مفنہ، دا کانود آک پاکستان نا مفاد اٹی ءُ، پاکستان نا خاطر آن کانود سازی ٹی بشخ ہلنگے نیب کانود آ ہیت کننگ کن تیار اُن۔ ہیت وگپ نا چِر ءِ اپوزیشن اِلا ہنا حکومت ہر جوان انگا ہیت ءِ بننگ کن تیار ءِ۔