گورنر خیبرپختونخوا نا اوغان طالبان رجیم نا بیدادی نا مذمت

پشاور، گورنر خیبرپختونخوا فیصل کریم کنڈی لوئر سویلی وزیرستان اٹی شاری تا اُرا و انگور اڈہ بازار آ اوغان طالبان رجیم نا بے خار بیدادی نا سخت مذمت ءِ کرینے۔ چارشنبے نا دے آگورنر ہاؤس پشاور نا ترجمان نا جاری کروک بیان نا رداٹ فیصل کریم کنڈی پارے کہ اوغان طالبان رجیم نا کنڈآن شاری آبادی و انگور اڈہ بازار ءِ ہدف جوڑ کننگ مذمت نا قابل ءِ۔ او پارے کہ پاکستان نا سلہہ بند فوج ءِ دمدستی، پبی و فیصلہ ئی ورندی تننگ آ سلام پیش کیوہ۔ او پارے کہ اوغان طالبان رجیم ہچ ءُ خوش فہمی اسے ٹی مف، پاکستان تینا الس آ جلہو و ملکی وتواجہی نا خلاف ورزی ءِ اسُل سگپک۔ گورنر پارے کہ خیبرپختونخوا دہشت گردی نا برخلاف جنگ اٹی ہزار آ جان تا قربانی تسنے۔ او پارے کہ کس ءِ پاکستان نا الس ءِ دھڑکوو ملکی سلامتی ءِ نسخان رسینگ نا موکل تفنہ، پاکستان نا برخلاف ہر وڑ انا بیدادی نا پبی ارادگی و سوگوی اٹ ورندی ءِ تننگک۔ گورنر پارے کہ وطن عزیز نا ہر انچ انا دفاع کن پاکستان نا سلہہ بند فوج ءِ مچ آ قوم انا پبی مخ تفی دوئی ءِ، دھڑکویا لغوری کارروائی پاکستان نا دفاع نا قومی ارادگی ءِ نزور کننگ کپک۔ او پارے کہ پاکستان نا وتواجہی، علاقائی سالمیت و الس نا رکھ آ ہچ ءُ سمجھوتہ اس کننگپک۔