انگور نا باغ آتیان جلہو مسنے تو میرات نا مالک آک ڈوہ آن پیشن افس،وزیراعلیٰ بلوچستان میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ مستونگ اٹی انگور نا باغ آتیان صوبائی وزیر داخلہ یا سیکورٹی فورس آتیا جلہو مریک تو میرات نا مالک آک ڈوہ آن پیشن افس بلکہ اوفتے کمکار گوندنگک۔ بلوچستان پبلک سروس کمیشن اٹی تحصیلدار تا بھرتی نا بابت غاو تیا کمیٹی جوڑ کننگانے ہرانا رپورٹ ءِ میڈیا نا مون آ اتنگک۔ حکومت بلوچستان گورننس ءِ زیات آن زیات ڈیجیٹلائزیشن نا کنڈ آ دننگ کن سنبرینگوک ءِ انتئے کہ ڈیجیٹلائزیشن آن السی خذمت، شفافیت و سروس ڈیلیوری ٹی نمان گچینی بریک۔ بلوچستان پولیس نا کنڈ آن مونی ایسفنگ مروک آ پوسکن آ و اپ گریڈ کروک آ ایپلی کیشن لس شاری تے نئے بیرہ کریمنل جسٹس سسٹم بلکہ ہڑدے ئی غاو و ویل آتا ایسری ٹی ہم آسراتی فراوان کیک‘ وخت اس کہ زالبول و شہید آتا پدخاہوت آتیکن درستی راستی کرفوک ڈیجیٹل آسراتیک السی پت اٹی ودکی نا سوب مریرہ۔ او دا ہیت ءِ جمعہ نا دے سینٹرل پولیس آفس کوئٹہ ٹی بلوچستان پولیس نا ڈیجیٹل انیشیٹوز نا بنائی دود آن تران کرسا کرے‘ داوخت آ صوبائی وزیر داخلہ و قبائلی باندات میر ضیاء اللہ لانگو، چیف سیکرٹری بلوچستان شکیل قادر خان، ایڈیشنل چیف سیکرٹری داخلہ حمزہ شفقات، آئی جی پولیس بلوچستان محمد طاہر خان تون اوار بلوچستان پولیس نا افسر، ورنا و میڈیا نا نمائندہ غاک ساڑی ئسر۔ داکان مست آئی جی پولیس بلوچستان محمد طاہر خان وزیراعلیٰ بلوچستان ءِ لانچ کروک 18 ایپلی کیشن نا بابت جم بریفنگ تس۔ وزیراعلیٰ بلوچستان میر سرفراز بگٹی پولیس نا ڈیجیٹل گام گیج آتا ستاءِ کرسا آئی جی پولیس، اونا ٹیم و آئی ٹی ٹیم ءِ مبارکبادی تس و پارے کہ حکومت نا اولیکو دے آن ہندا سوچ ءِ کہ گورننس ءِ زیات آن زیات ڈیجیٹلائزیشن نا کنڈ آ دننگے تاکہ الس ءِ گچین خذمت فراوان کننگے و نظام اٹی شفافیت و جوانی ءِ ہر وڑ اٹ پک کننگے۔ او پارے کہ بلوچستان پولیس نا 8 مسکوہی ایپلی کیشن آتے پین جوانی نا کنڈ آ دننگانے وخت اس کہ 8 پوسکن ایپلی کیشن درستی راستی کننگانو۔ دا گام بلوچستان نا لس بندغ کن پورو وڑ اٹ فائدہ نا سوب مریک و اودے نئے بیرہ کریمنل جسٹس سسٹم بلکہ ہڑدے ئی بنداو آ مون تروک غاو و ویل آتا ایسری ٹی ہم کمک رسینگک۔ وزیراعلیٰ پولیس نا آئی ٹی ٹیم و دا پروجیکٹ آ کاریم کروک افسر آتے خراجِ تحسین پیش کرسا پارے کہ مچ آ ٹیم مبارکبادی نا کڑزک۔ (آن لائن)