ملکی شونداری کن خراج نظام اٹ جوانی اتنگ کن گام گیج کننگ اُن،وزیر اعظم محمد شہباز شریف

اسلام آباد، وزیر اعظم محمد شہباز شریف خراج دُزی، اسمگلنگ و کانود آن چَپ کاروبار نا برخلاف گچین کارروائی تے ترند کننگ و ایف بی آر اٹ اصلاحات آتے پک وخت اٹی پورو کننگ نا پارت کرسا پارینے کہ حکومت ملکی شونداری کن خراج نظام اٹ جوانی کننگے۔ وزیر اعظم محمد شہباز شریف نا کماشی ٹی ایف بی آر اٹ اصلاحات آ ہفتہ وار جاچ دیوان جمعہ نادے اڈ ہلک۔ وزیرِ اعظم آفس نا میڈیا ونگ انا کنڈآن جاری بیان نا رداٹ وزیرِاعظم ءِ دیوان اٹ ”پرال” نا اولسر ٹہیفنگ نا بابت حوال تننگا۔ وزیرِاعظم دیوان آن تران کرسا پارے کہ خراج نظام اٹ اصلاحات کن گام گیج آتا نفاذ ءِ پک کروک وخت اٹ پورو کننگے و اصلاحات نا تھرڈ پارٹی آڈٹ ءِ پک کننگے۔ وزیرِ اعظم پارے کہ ملکی شونداری کن خراج نظام اٹ اصلاحات نافذ کننگ اُن۔ او ڈیجیٹلائزیشن، پیدوار نا چاروکی و خودکار نظام ءِ ایف بی آر اصلاحات نا اہم تمبہ گوندسا خراج دُزی، اسمگلنگ و کانودآن چَپ کاروبار نا برخلاف گچین کارروائی ءِ پین ترند کننگ نا پارت کرے۔ او ایف بی آر اٹ جوان شہرت والا گڈز ایویلیویٹرز نا تعیناتی نا عمل ءِ ستاکڑزوک گوندسا پارے کہ چیئرمین ایف بی آر و اونا ٹیم انا دا بابت کوشست آک ستا کڑزرہ۔ دیوان اٹ ایف بی آر اٹ برجااصلاحات، خاص وڑ اٹ ”پرال” نا اولسرٹہیفنگ‘ خراج نظام نا ڈیجیٹلائزیشن و اسمگلنگ نا توننگ کن کننگوک گام گیج آتیا سرجمی اٹ حوال تننگا ہراٹی پاننگا کہ خراج نظام ءِ پوسکن، گچین و ڈیٹا غا تالان کننگ کن آئرس 3.0، پوسکن خراج آپریٹنگ ماڈل و سینٹرل ڈیٹا ہب آ ریسہ وار کاریم برجاءِ۔ آئرس 3.0 نا ڈیزائن کن جہانی کنسلٹنٹس آتا خذمت ءِ ہلنگانے۔ حوال اٹ پاننگا کہ پرال اٹ ٹیکنالوجی، ڈیٹا سیکورٹی، آپریشن و خراج ڈومین تون اوار چندی بشخ آتے ٹی پوسکن سینئر سرکڑدہ غاتا تعیناتی کننگانے وخت اس کہ آئرس 3.0 نا رداٹ خراج نظام ءِ پین گچین جوڑ کننگ، آٹو خراج نا تصور ءِ پائلٹ کننگ و آخبت اٹ اے آئی و مشین لرننگ ءِ خراج وصولی ءِ گچین کننگ کن کاریم اٹ اتنگ نا ڈٹ آ کاریم ترندی اٹ برجاءِ۔ کسٹمز نا بشخ اٹ فیس لیس اسیسمنٹ نا مثبت زہم تا بابت دیوان ءِ پاننگا کہ جنوری آن جون 2026ء اٹی فی گڈز ڈیکلریشن ریونیو ٹی 12 درسد ودکی ریکارڈ کننگا۔ حوال اٹ پاننگا کہ فیس لیس اسیسمنٹ نا سوب آن فی گڈز ڈیکلریشن نا بنگ آتے ٹی گچینی تون اوار اوار درآمدی بے ڈولی تا پیدواری و چاروکی ٹی ہم ودکی مسنے۔ کسٹمز اسیسمنٹ نا نظام ءِ پین گچین کننگ کن 280 گڈز ایویلیویٹرز نا بھرتی نا عمل گڈیکو ریسہ ٹی ءِ۔ اسلام آباد اٹ سینٹرل اسیسمنٹ یونٹ نا جوڑ کننگ آ ہم پیش رفت برجاءِ، عبوری انتظام نا رداٹ یونٹ ءِ 31 دسمبر 2026ء اسکان فعال کننگ وخت اس کہ پورو گچین آسراتی ءِ جون 2027ء اسکان پوسکن کمپلیکس اٹ فعال کننگ نا ہدف پک کننگانے۔ دیوان ءِ پاننگا کہ جولائی 2025 اٹ ڈیجیٹل انوائسنگ نا کمک اٹ 236 ارب روپئی نا ٹرانزیکشن مس وخت اس کہ جولائی 2026 اٹ اوفتا کچ 2.5 ٹریلین روپئی نا کچ آن گدرینگانے، و دسمبر 2026 اسکان ڈیجیٹل انوائسنگ نا کمک اٹ 4 ٹریلین روپئی نا ٹرانزیکشن نا ہدف پک کننگانے۔