پنجگورتعلیمی کارکڑد، داخلہ و کلسٹر بجٹ نا بابت اہم دیوان

پنجگور اٹی تعلیمی کارکڑد طالب علم آتا پوسکن داخلہ و کلسٹر بجٹ نا شفاف کاریم اٹ اتنگ نا بابت اسہ اہم ءُ دیوان اس گورنمنٹ بوائز ماڈل ہائی اسکول پنجگور اٹی اڈ ہلک، ہراٹی تعلیمی ادارہ غاتا کارکڑد، انتظامی باندات‘ طالب علم آتا داخلہ و کلسٹر بجٹ نا قاعدہ نا رِد اٹ کاریم اٹ اتنگ نا پورو جاچ ہلنگا۔ دیوان اٹی ایڈیشنل ڈپٹی کمشنر پنجگور نظام رحیم بلوچ، ڈسٹرکٹ ایجوکیشن آفیسر عابد حسین، پرنسپل گورنمنٹ بوائز ماڈل ہائی اسکول ملک مقبول، ڈی او ای میل سعید اکبر، ڈی او ای فیمیل گودی روبینہ، کل ڈی ڈی اوک، آر ٹی ایس ایم پنجگور قاسم و مچ آ ضلع نا ہیڈ ماسٹر، ہیڈ مسٹریس و ہیڈ کلسٹرآک پبی وڑ اٹ بشخ ہلکر۔ دیوان نا وخت آ اسکول تا جم کارکڑد، طالب علم آتا داخلہ، فیڈنگ اسکول تا باندات و انتظامی باندات آتا جم جاچ ہلنگا۔ اسکول نا سروک آتے پارت کننگا کہ او طالب علم آتا داخلہ غاتیٹی ودکی، تعلیمی آب و ادارہ غاتا ڈسپلن و نظم و نسق آ خاص چکار کیر، وخت اس کہ فیڈنگ اسکول آتا ریکارڈ ءِ باقاعدگی اٹ اپ ڈیٹ کننگے۔ کلسٹر بجٹ نا بابت خاص پارت کننگا کہ فنڈ آتے پورو شفاف و قاعدہ و ضابطہ نا رِداٹ کاریم اٹ اتنگے تاکہ ہچ ءُ بے قاعدگی اس مون آ بف۔ پنجگور (نامہ نگار)