زند انا بنائی ہزار دے چنا نا جانجوڑی و آخبت کن بھاز اہم مریرہ،ڈسٹرکٹ ہیلتھ آفیسر چاغی

دالبندین اٹی محکمہ جانجوڑی و نیوٹریشن ڈائریکٹوریٹ بلوچستان نا کمک اٹ ضلع چاغی ٹی ورلڈ بریسٹ فیڈنگ منتھ نا رد اٹ ڈی ایچ او آفس دالبندین اٹی اسہ پریس بریفنگ اسے بست و بند کننگا، ہراٹی لمہ نا پال انا اہمیت، چنا تا گچین ردوم و غذائی ویل آتا بابت معلومداری تننگا۔ پریس بریفنگ آن ڈسٹرکٹ ہیلتھ آفیسر چاغی ڈاکٹر عبدالمالک بلوچ، ڈپٹی ڈی ایچ او ڈاکٹر جاوید حسن سیاہ پاد و ڈسٹرکٹ نیوٹریشن کوآرڈینیٹر خلیفہ عبدالباسط ایجبانی تران کریر۔ دا وخت آ جانجوڑی محکمہ نا افسر، لیڈی ہیلتھ ورکرز، نیشنل پروگرام نا کارندہ و میڈیا نا نمائندہ غاک بھلو کچ اسے ٹی بشخ ہلکر۔ ڈسٹرکٹ ہیلتھ آفیسر ڈاکٹر عبدالمالک بلوچ پارے کہ لمہ نا پال/ چنا کن قدرت نا کنڈ آن اسہ گچین و زند بچفوک ءُ کِنشت اسے، ہرا چنا نا بقا، جسم و ذہنی ردوم و ناجوڑی تیان رکھ اٹی بھاز اہم ءُ کڑد اس ادا کیک۔ او مستی پارے کہ زند انا بنائی 1 ہزار دے چنا نا جانجوڑی و آخبت کن بھاز اہم مریرہ، دا وخت اٹی لمہ نا پال/ چنا کن کل آن گچین آ کِنشت فراوان کیک۔ او پارے کہ بلوچستان اٹی کم و وَد 61.1 درسد لمہ غاک چنا نا ودی مننگ نا اولیکو گھنٹہ ٹی چنا ءِ ہُڑفنگ ءِ بنا کیرہ، ولے دا کچ اٹ پین جوانی اتنگ نا بھاز گرج ءِ۔ آگاہی نا کمتی، منہ ربیدگی روایت، کاریم نا جاگہ غاتیٹی آسراتی تا تنکی و جانجوڑی ہند آتے ٹی کچ اٹنگا کمک لمہ نا چنا ءِ پال/ ہڑفنگ نا کسر اٹی بھلا اڑاند آک ءُ۔ ڈسٹرکٹ نیوٹریشن کوآرڈینیٹر خلیفہ عبدالباسط ایجبانی پارے کہ نیوٹریشن ڈائریکٹوریٹ، یونیسف، لیڈی ہیلتھ ورکرز پروگرام و ضلعی جانجوڑی محکمہ نا اسیجائی کمک اٹ اگست نا مچ آ تُو اٹی ضلع چاغی تون اوار مچ آ بلوچستان اٹی آگاہی سرجز آک پدریسہ برجا ءُ۔ او پارے کہ لمہ، نگہداشت کروک، مذہبی راہشون و ہندی کمیونٹی تون آگاہی سیشن، سیمینار و بریسٹ فیڈنگ واک تون اوار جتا جتا پروگرام اڈ تننگ انگ ءُ، وخت اس کہ اسکول و کالج نا طالب علم و استاد آتے ہم بنائی کنشت نا اہمیت آن پورو آگاہ کننگ انگ ءِ۔ خلیفہ عبدالباسط ایجبانی پارے کہ لمہ نا پال/ ءِ شون تننگ بیرہ لمہ نا زمواری اف بلکہ مچ آ راج انا اہم ءُ زمواری اسے۔ کاریم نا جاگہ غاتیٹی لمہ غاتیکن گچین چاگڑد، زچگی نا وخت آ بھرمی سلاہ‘ ڈبہ نا پال/ا نا بے گرج تشہیر نا توننگ و نزور چناتا وخت آ چاروکی نا کمک اٹ چناتے جان جوڑ و رکھی آخبت فراوان کننگ مریک۔ چاغی (نامہ نگار)