ناگ، کنٹریکٹ استاد آتا خواری آن اسکول جوان چلینگ انگ ءِ،ڈسٹرکٹ ایجوکیشن آفیسر واشک

وزیر تعلیم راحیلہ حمید درانی و سیکرٹری سکولز ایجوکیشن لال جان جعفر نا پارت آتا رد اٹ ڈسٹرکٹ ایجوکیشن آفیسر واشک، حاجی مختیار احمد ڈومکی گورنمنٹ بوائز پرائمری اسکول چھڈ گاجیان نا دورہ ءِ کرے و جم جاچ ءِ ہلک۔ دا وخت آ اسکول نا ہیڈ انچارج اودے بخیر کرے۔ دورہ نا وخت آ ڈی ای او اسکول نا انتظامی و تعلیمی باندات آتا جم جاچ ءِ ہلک۔ او اسکول نا ریکارڈ ءِ خوڑتی اٹ چیک کرے، اوکان پد او کلاس آتا دورہ ءِ کرے ہراڑے طالب علم آتیان خواننگ نا بابت سوج کرے و اوفتا تعلیمی لائخی نا جاچ ءِ ہلک۔ او طالب علم آتے پارے کہ ساڑی دور پوسکن آ ٹیکنالوجی و علم انا دور ءِ، ہندا سوب آن خواری، استخواہی اٹ تعلیم دوئی کیر۔ ڈی ای او واشک حاجی مختیار احمد ڈومکی اسکول اٹی خذمت سر تروک ہڑتوم آ کنٹریکٹ استاد آتا کارکڑد نا ستاءِ کرسا پارے کہ اوفتا خواری، استخواہی و زمواری نا سوب آن اسکول فعال ءُ وڑ اسے ٹی چلیفنگ انگ ءِ۔ او دا ہیت آ است جمی نا درشانی ءِ کرے کہ دا اسہ پرائمری اسکول اسے، ولے داڑے مڈل اسکان نا کلاس آک ہم برجا ءُ۔ دورہ نا وخت آ او اسکول اٹی تفوئی کاریم تا ہم جاچ ءِ ہلک‘ ہراڑے او تفوئی کاریم، کاریم اٹ اتوک میٹریل و تفوئی کاریم نا آب انا خوڑتی اٹ جاچ ءِ ہلک۔ اخیر اٹ ڈی ای او واشک اسکول نا استاد آتا کوشست آتا ستاءِ کرے و دا اومیت نا درشانی ءِ کرے کہ او آخبت اٹی ہم ہندا جوزہ، دیانت داری و خواری اٹ تینا تعلیمی زمواری تے سر ایترہ۔