نوشکے پریس کلب نا گچین کاریک پورو، مالک عدیل مینگل صدر گچین

نوشکے پریس کلب نا سالانہ گچین کاری تا رد اٹ ابراہیم بلوچ نا کماشی ٹی اسہ اہم ءُ دیوان اس اڈ ہلک، ہراٹی پریس کلب نا باسک آک تنظیمی و انتظامی باندات آتیا سرجم وڑاٹ سجفیر۔ دیوان اٹی سلابت، امنائی و گچین چاگڑد اٹی پوسکن آ کابینہ نا گچین کاری عمل اٹی اتنگا۔ دیوان اٹی امنائی وڑاٹ مالک عدیل مینگل ءِ صدر، صلاح الدین بلوچ ءِ نائب صدر، حاجی محمد سعید بلوچ ءِ جنرل سیکرٹری، ابراہیم بلوچ ءِ جوائنٹ سیکرٹری، فہد خالد بلوچ ءِ فنانس سیکرٹری و ماما بشیر احمد ءِ آفس سیکرٹری گچین کننگا۔ دا وخت آ پوسکن گچین مروک آ صدر مالک عدیل مینگل و جنرل سیکرٹری حاجی محمد سعید بلوچ تینا تران اٹی پاریر کہ نوشکے پریس کلب نا باسک آک تین پہ تینی سیوت، پت، رواداری و جمہوری قدر آتا شاہدی ءِ ترسا امنائی اٹ پوسکن آ کابینہ ءِ گچین کرسا اسہ جوان و متبر ءُ روایت اس پک کرینو، ہرا صحافتی برادری نا سیوت نا درشانی ءِ۔او پاریر کہ پوسکن آ کابینہ باسک آتا پت آ پورو بننگ کن پبی وڑاٹ تینا زمواری تے سر ایتک۔ پریس کلب ءِ پین فعال، سوگو و شرفدار ءُ ادارہ اس جوڑ کننگ، صحافی تا حق آتا رکھ، کسبی لائخی تا شون، صحافتی آجوئی نا سوگوی و السی ویل آتے بھرمی وڑاٹ پاش کننگ کن کل دوئی وسیلہ و لائخی تے کاریم اٹ اتنگک۔ او مستی پاریر کہ نوشکے پریس کلب ءِ ضلع نا صحافتی برادری نا اسہ دروری‘ منظم و فعال ءُ پلیٹ فارم اس جوڑ کننگ کن کل باسک آتا اواری اٹ کاریم کننگک و تین پہ تینی سلابت، سیوت و شفافیت نا پالیسی آ عمل کرسا ادارہ نا شون و شرف اکن وس انا کچ آ گام گیج کننگک۔