مین ٹرانسمیشن لائن آن بجلی بند،ماشکیل اٹی لُوڑ و مُج آن بھسکاری، بجلی نا کیہی کھمبہ تمار

ماشکیل اٹی بھلا لُوڑ و مُج و ترند آ تہو تا سوب آن بھلو کچ اسے ٹی بھسکاری مسنے ہراڑے ہڑدے ئی زند بھاز زہمی مس۔ بھلا لُوڑ بجلی نا رسینگ گیگ نظام، سرکاری ماڑی، تعلیمی ہند، درخت و جندی میرات آتے بھلو نسخان اس رسیفے، وخت اس کہ مچ آ علاقہ کیہی گھنٹہ غاتیان بجلی نا مفننگ نا سوب آن تہاری و بھلو خواری اسے ٹی اختہ ءِ۔ لُوڑ نا ترندی ہندن ئس کہ مین ٹرانسمیشن لائن نا کیہی کھمبہ غاک تمار، ہراڑان ماشکیل شار و ایب کیب انا جتا جتا علاقہ غاتیٹی بجلی نا فراوانی اسُل بند مس۔ بجلی نا بند مننگ آن اُرا، بازار، سرکاری دفتر و کاروباری ہند آتیٹی کل سرجز آک زہمی مسر، وخت اس کہ موبائل فون چارج مفننگ و انٹرنیٹ سروس نا مفننگ آن شاری تے حال احوال نا رد اٹ ہم بھلو خواری اسے مون تروئی تما۔ لُوڑ نئے بیرہ بجلی نا نظام بلکہ سرکاری و جندی میرات آتے ہم تینا پلویڑ اٹی ہلک۔ گورنمنٹ ہائیر سیکنڈری سکول لدگشت ماشکیل نا رکھی چاردیوالی کیہی ہند آتیان تما، وخت اس کہ اسکول اٹی خلوک لکھ آ روپئی نا سولر سسٹم ہم اسُل بیکار مس۔ تعلیمی تپہ غاک دا گڑتی نا درشانی ءِ کرینو کہ اگہ دمدستی جوڑجاڑ کننگ متو تو طالب علم آتا تعلیم و اسکول نا کاریمک زہمی مریرہ۔ ماشکیل شار و کیبی علاقہ غاتیٹی کیہی بھلا درخت آک کسر و گاڈی تیا تمار، ہرانا سوب آن کیہی گاڈی تے نسخان مس۔ کیہی علاقہ غاتیٹی ماڑی تا دیوالک ہم نسخانی مسر‘ ولے خوش قسمتی اٹ ہچ ءُ جانی نسخان اس متنے۔ ایلو کنڈ آ بجلی نا بھلا لوڈشیڈنگ ہندن ءُ وخت اسے آ مسنے ہراتم ماشکیل اٹی بھاز باسنی ءِ۔ درجہ حرارت نا ودنگ آن شاریک خواری تے ٹی گٹ ءُ۔ پنکھہ، کولر، واٹر پمپ و ایلو بجلی نا ازباب آتا بند مننگ آن اُراتیٹی دیر انا فراوانی ہم زہمی مسنے، ہراڑان چنا، بھلا و ناجوڑ آتے کل آن زیات خواری مون تروئی تمانے۔ بھاز باسنی و بجلی نا مفننگ الس نا خواری تے کیہی ہموخس ودفے۔ راجی سرکڑدہ و السی تپہ غاک حکومت بلوچستان، ضلعی انتظامیہ، کیسکو کمامدار و تعلقدار ادارہ غاتیان خواست کرینو کہ دمدستی و ہلہلہ ئی بنداو آ پین کارندہ و مشینری فراوان کرسا تموک آ کھمبہ و ٹرانسمیشن لائن تے ا جوڑ کننگے، تانکہ بجلی نا دمدستی بحالی پک مرے۔