پاک بحریہ/آبدوز ہنگور نا سرسہب آزموندہ‘مُر اسکان خلنگ کروک کروز میزائل فائر

راولپنڈی / پاک بحریہ نا آبدوز ہنگور دیکی بحیرہ عرب اٹی اولیکو لائیو ویپن سم کاری ءِ سرسہبی اٹ پورو کرے۔ آئی ایس پی آر نا رِد اٹ پاک بحریہ نا آبدوز ہنگور دیکی بحیرہ عرب اٹی اولیکو لائیو ویپن سم کاری سرسہبی اٹ پورو کرے و پی این ایس/ایم ہنگور مر انگا خلنگ کروک اینٹی شپ کروز میزائل سرسہبی اٹ فائر کرے۔ آئی ایس پی آر پارینے کہ اینٹی شپ کروز میزائل پک ہدف ءِ بھاز گچین وڑ اٹ شست کرے، سرسہب سم کاری آن ہنگور نا ویپن سسٹمز و جنگی تیاری پک مس‘ ہنگور نا سرسہب سم کاری پاک بحریہ نا دیر اٹ جنگی لائخی تے ٹی اہم ءُ مزل نا نشان اسے۔ نیول چیف ایڈمرل نوید اشرف پی این ایس/ایم ہنگور نا جنگی لائخی و کارندہ غاتا جنگی چاہنداری نا ستاءِ کرے‘ داوخت آ نیول چیف پارے کہ دیر اٹ جنگی لائخی تے ٹی پد ریسہ ودکی آپریشنل تیاری وپک دفاعی لائخی تیکن بھاز المی ءِ‘ پاک بحریہ پاکستان نا بحریہ سیم تا دفاع و ڈیہہ اٹی امن و سوگوی کن سنبرینگوک ءِ۔داکان بیدس وزیراعلیٰ بلوچستان میر سرفراز بگٹی پاکستان بحریہ و اونا سرکڑدہ غاتے پوسکن اوار کروک آبدوز پی این ایس/ایم ہنگور نا اولیکو سرسہب دراست سلہہ بند آزموندہ غا مبارکبادی ترسا خراجِ تحسین پیش کرینے۔ وزیراعلیٰ پارے کہ اینٹی شپ کروز میزائل نا کمک اٹ بھاز مُر ساڑی ہدف ءِ گچین وڑ اٹ شست کننگ پاکستان بحریہ نا آبدوز فورس انا گمان آن زیات آپریشنل تیاری، کسبی چاہنداری و بڑزکو جنگی لائخی تا پیدوار شاہدی ءِ‘ میر سرفراز بگٹی پارے کہ پاکستان نا سلہہ بند فوج ملک انا دفاع و قومی سلامتی نا رکھ اکن ہر وڑ انا چیلنج آتتون مون تننگ کن پورو بود تخک۔ پاک بحریہ نا پوسکنوڑ آبدوز نا سرسہب سلہہ غاتا آزموندہ ملک انا دفاعی لائخی و کسبی تیاری تا ڈیک ءِ‘ وزیراعلیٰ بلوچستان چیف آف دی نیول اسٹاف ایڈمرل نوید اشرف و پی این ایس/ایم ہنگور نا اواری و آپریشنلائزیشن نا عمل تون تعلقدار کل افسر، کارندہ غاتا کسبی کارکڑد نا ستاءِ ہم کرے او پاکستان بحریہ نا افسر و ورناتیکن نیک انگا استخواہی تا درشانی ءِ کرسا پارے کہ قوم ءِ تینا سلہہ بند فوج انا کسبی لائخی و وطن نا رکھ اکن اوفتا خذمت آتیا گمر ءِ۔