بلوچستان عوامی پارٹیءِ کس انا است خواہی آ چٹفپنہ، قدوس بزنجو

کوئٹہ : وزیراعلی بلوچستان وبلوچستان عوامی پارٹی نا صدر عبدالقدوس بزنجو پارینے کہ کس انا استخواہی آ بلوچستان عوامی پارٹی ءِ چٹفپنہ‘ننا پارٹی اولیکودے آنبار سوگو ءِ‘ کس انا ہننگ آن ہچ فرق تمپک‘ ہرابندغ آک بننگ خوارہ اوفتے بخیر کینہ‘ ننا درگہ غاک کل اکن ملوک ءُ‘ مسکوہی صدر آصف علی زرداری تون اوار کل سیاسی جماعت و اوفتا سرکڑدہ غاتتون احترام نا رشتہ ءِ۔ داہیت آتے او میڈیا نا نمائندہ غاتتون ہیت وگپ کرسا کرے‘اوپارے کہ بلوچستان عوامی پارٹی ہرا مسخت آتیکن جوڑ کننگاسس بھلوحد اسسکان سرسہبی رسینگانے‘ ننا حکومت صوبہ نا شونداری وشونہالی کن چنکو وخت اسے ٹی ہندن ءُ جیرتی و تاریخی ءُ فیصلہ کرینے ہرافتا درور مستین رسینگپک‘ ریکو ڈک معاہدہ بارڈر مارکیٹ جوڑ کننگ‘ مخلوق ناروزگار واوفتا عزت نفس انا رکھ‘سٹی آ چیک پوسٹ آتے چٹفنگ‘ گوادر نا بجلی ودیر انا ویل ءِ ایسر کننگ‘ ماہی گیر تا حق آتا رکھ و اوفتے لیبر نا درجہ تننگ کنٹریکٹ استادو ایلو محکمہ غاتا ملازم آتے پکاکننگ‘ پرامن چاگڑد اٹ بلدیاتی گچین کاری‘ مردم شماری پی ایس ایل نا نمائشی میچ 19 سال آن پد قومی گوازی تا اڈتننگ‘ بھلو وخت اسے آن پد خولم نا وخت آ ہلنگ‘نوکاپ نا زہمی تا کمک و بحالی رمضان المبارک اٹ اسہ لکھ خاہوت ءِ تُو اسے نا راشن تننگ۔ 2022-23 نا جوان والس دوست بجٹ دھرنا و برانز تے افہام و تفہیم اٹ چٹفنگ‘ ای خدمت مرکز جوڑ کننگ‘ شونداری عمل اٹ شفافیت کن اولیکو صوبہ ہراڑے ای ٹینڈرنگ نابنا کننگا و پین کیہیک سرسہبیک ننا کریڈٹ ءُ‘ صوبہ ناویل آتے ایسر کننگ کن جوڑ مروک ننا جماعت صوبہ و ملکی سیاست اٹ اہم کڑدار ادا کرینے۔ او پارے کہ بی اے پی ءِ کس انا استخواہی آ چٹفپنہ‘ ننا جماعت نا ہر ممبر صدر ءِ کل انا سلاہ تے شرف ایتنہ‘ صوبہ نا گچینی کن ہرا سلاہ رسینگک اوڑا عمل کننگ نا کوشست کیوہ۔ اوپارے کہ تینا جماعت بلوچستان عوامی پارٹی نا سوگوی کن مستی ہم کاریم کینہ‘ او پارے کہ منہ تپّہ سے ناکنڈآن دا تاثر تننگ انگ ءِ کہ بلوچستان عوامی پارٹی چٹسا پین جماعت اسے ٹی اوار مریک۔ او دا ہیت انا سختی اٹ تردید کرسا پارے کہ ننا جماعت بروک آ گچین کاری تے ٹی سیاسی پارٹی تتون گچین کاری سیوت تو کیک ولے بلوچستان عوامی پارٹی ءِ چٹفنگ یا پین جماعت اسے ٹی اوار کننگ نا خبرک راست افس‘اوپارے کہ صوبہ ناویل آتے ایسر والس نا حق آتا رکھ اکن بنجائی حکومت نا مون آ ننا پارٹی ہرا وڑ سخت موقف تینائی کرے اونا مستین اٹ درور رسینگپک۔ بی اے پی جوڑ کننگ نا ہم ہندا مسخت ئس کہ نن ملک انا کل سیاسی جماعت آتتون بریبری نا بنداو آ تینا صوبہ نا ویل آتا ایسری ءِ پک کینہ۔ ریکوڈک ڈٹ آ معاہدہ دانا اسہ مثال اسے۔ او ملک انا ساڑی زرگزرانی و سیاسی حالیت آتیا گڑتی درشان کرسا پارے کہ جمہوری سیاسی جماعت آتا اواری اٹ ویل آتے ایسر کننگ نا گرج ءِ‘ ادارہ غاتے شرف تننگ کل انا لازم ءِ‘ ملک بے چیٹی و پین تنکی تے سگنگ کپک‘ تینا الس نا حالیت آتے بدل کننگ نا گرج ءِ ہراکہ دا وخت آ بد انگا کبینی نا نسخل اٹ نسنگ انگ ءُ۔اسہ سوج اسے نا ورندی ٹی وزیراعلیٰ بلوچستان پارے کہ تدوک آ دے چیئرمین سینٹ تون پارٹی نا بابت اوڑدہی مسنے و نن بھاز اہم ءُ فیصلہ کرینن۔

(آن لائن)