جیل آتیٹی نیاڑی تون بیداد نا نوٹس ہلنگے، پی ٹی آئی نا خواست

اسلام آباد : وزیرِداخلہ رانا ثناء اللہ نا پریس کانفرنس و دزگیر نیاڑی کارندہ غاتتون بیداد نا باندات آ پاکستان تحریک انصاف چیف جسٹس آف پاکستان آن دمدستی نوٹس ہلنگ ناخواست کرے۔ پاکستان تحریک انصاف نا بنجائی حوالکاری سیکرٹری رؤف حسن دزگیر بندی خاص وڑ اٹ نیاڑی کارندہ غاتا عزت و ناموس واوفتتون کروک سلوک نا جاست پاست کن چیف جسٹس آف پاکستان آن باضابطہ خواست اٹ بڑزکو کہولی جاست پاست ناخواست کرسا پارینے کہ وزیرداخلہ رانا ثناء اللہ نا پریس کانفرنس آن پد سیاسی بندی خاص وڑ اٹ نیاڑی تا آبرو نابابت گڑتیک ودی مسنو‘ چیف جسٹس آف پاکستان دمدستی بڑزکو کہولی جاست پاست نا بست وبند کے‘ مچ آ ملک انا جیل آتے ٹی سیاسی بندی خاص وڑ اٹ نیاڑی تتون امر سلوک کننگ انگ ءِ‘ کانود و اُراتا تقدس ناپاش خلاف ورزی ءِ کرسا پی ٹی آئی راہشون و کارندہ غاتا ہنکین تیا امر چھاپہ خلنگ انگ ءِ؟ پی ٹی آئی نا راہشون و کارندہ غاتا خاہوت آتے کانودی وعدالتی کارروائی ان بیدس ہرا وڑ تنک کننگ انگ ءِ‘ دھڑکو تننگ انگ ءِ و اوفتا بنداوی آئینی حق آتے لتاڑ کننگ انگ ءِ۔رانا ثناء اللہ نا پریس کانفرنس آن پد دا باندات بھاز اہمیت تینائی کرینے‘اوپارے کہ رانا ثناء اللہ نا پریس کانفرنس آن دا پیدوار مس کہ اونا ڈوہ تیا پڑدہ شاغنگ پی ٹی آئی واونا کارندہ غاتے گٹ کننگ نا کوشست اسے۔

(آن لائن)